Деновиве сведочиме на постапки и изјави кои македонските граѓани не ги доживуваат пријателски, убедени сме дека двете држави и двата народи решението ќе го најдат низ дијалог, се наведува во денешното соопштение од Владата посветено на односите со Бугарија
Владата се огласи попладнево со соопштение кое се однесува на Бугарија, а во кое се посочува, меѓу другото, дека „деновиве сведочиме на постапки и изјави кои македонските граѓани не ги доживуваат пријателски“
Убедени сме дека двете држави и двата народи решението ќе го најдат низ дијалог, се нагласува во владиното соопштение.
„Со Договорот од 1 август 2017 година, Северна Македонија и Бугарија потпишаа дека ќе обесхрабруваат провокации кои не се во интерес на ниту една страна, дека нема да влегуваат во круг на навреди, обвинувања и говор на омраза, кои не носат ништо добро за никого, а најмалку за македонскиот и за бугарскиот народ. Наместо тоа, Договорот обврзува да се одржува европски дијалог и да се почитува и применува целосно, вклучувајќи го и темелниот принцип за немешање во внатрешните работи на двете земји“,
се наведува во реакцијата на Владата.
Потоа се нагласува дека Владата има разбирање за внатрешната политичка предизборна состојба во Бугарија, но, како што се нагласува, тоа не е причина за политички пораки за кампањски потреби.
„Имаме разбирање за внатрешна политичка предизборна состојба во Бугарија и комплицираниот изборен тек, но сметаме дека тоа не е причина за политички пораки за кампањски потреби, кои излегуваат од рамката на европските вредности и принципи за почитување на кој е изграден Договорот за пријателство, добрососедство и соработка. Таквите тонови не се доживуваат како пријателски од страна на македонските граѓани. Немешањето во внатрешните работи е принципиелен став, а таков став очекуваме и од соседите,“
се наведува во соопштението.
Од Владата велат дека постигнувањето договори и посветеност на нивната имплементација, меѓу другото, се потребни за помирување на народите и државите во нашиот регион, за, како што се наведува, да живееме во траен мир и да развиваме трајно пријателство, како што тоа го правиме со сите наши останати соседи.
„Остануваме посветени на дијалог со Софија и барање взаемно прифатливо решение за прашањата што се отворија. Република Северна Македонија покажа максимална проактивност и политичка волја да се доразјаснат одредени дилеми и понудивме одговор на повеќе од покренатите прашања. Континуирано работиме на активна имплементација на договорот. Решенијата не се во минатото, тие се во иднината, а иднината бара дијалог, не монолог за внатрешна употреба. Кога станува збор за земја членка на ЕУ и за земја со потврдено признание дека ги исполнила сите услови за почеток на преговори за членство, дијалогот е единствено решение за билатералните прашања и за изнаоѓање меѓусебно разбирање. Република Северна Македонија е подготвена за тој дијалог. Време е Бугарија да ја покаже истата подготвеност“,
се наведува во реакцијата на македонската Влада.