Во среда во Рим ќе отпатува претседателот Стево Пендаровски, заедно со бугарскиот претседател Радев
Македонска црковно-државна делегација утрово имаше поклонение на гробот на свети Кирил во Рим, соопшти Комисијата за односи со верските заедници и религиозни групи.
Делегацијата, во која учествуваа директорот на Комисијата за односи со верските заедници, Даријан Сотировски, македонската амбасадорка при Светата Столица, Марија Ефремова, генералниот конзул во Венеција, Стојан Витанов, и вршителот на должност во македонската амбасада во Италија, Магдалена Димова, присуствуваше на молебенот на гробот на св. Кирил во базиликата „Св. Климент“.
Чиноначалствуваше митрополитот Европски г. Пимен во сослужение на епископот Стобиски г. Јаков и свештеници на Европската епархија на Македонската православна црква- Охридска архиепископија.
Во среда, делегации на Северна Македонија и на Бугарија заедно ќе го одбележат Денот на светите браќа Кирил и Методиј. Претседателите на двете држави, Стево Пендаровски и Румен Радев, на 26 мај, заедно со бугарски авион, ќе отпатуваат за Рим.