Од Владата остануваат на истиот став, дека времетраењето на тие мерки за продолжено породилно отсуство од 6 месеци било доволно и дека сега треба да се вратат на работа
Мајките на деца до шестгодишна возраст и оние кои се на продолжено породилно отсуство, денеска повторно излегоа на протест пред Владата, против одлуката да се вратат на работа на 23 септември.
Бараат продолжување на породилното отсуство до крајот на годината, бидејќи како што велат, со новите случаи на заболени градинките се ризик за нивните деца.
Според владината одлука, од 14 септември, сите родители на деца од 0 до 6 години, кои досега беа ослободени од работниот процес, треба да се вратат на работа почнувајќи од 23 септември. Истото важи и за сите оние чие породилно отсуство беше продолжено од прогласувањето на пандемијата, односно за некои дури и за шест месеци.
Ова е втор ваков протест. Првиот се одржа минатата недела кога најавија дека ако не им се прифатат барањата, тие ќе продолжат со протестите.
Министерот за здравство, Венко Филипче, за барањата на мајките со продолжено породилно отстуство и натаму да не одат на работа, во саботата рече дека остануваат на истиот став, дека времетраењето на тие мерки за продолжено породилно отсуство од 6 месеци било доволно и дека сега треба да се вратат на работа. Сепак, посочи дека ги слушнале нивните забелешки и натаму ќе контактираат.