Во изјава пред седиштето на СДСМ, Ковачевски нагласи дека верува оти Алтернатива ќе влезе во Владата, но дека одлуката за тоа кој ќе биде мандатар/премиер ќе ја донесат партиските органи по завршувањето на внатрепартиските избори
Во секој момент се очекува да почне новата, трета по ред средба во Клубот на пратеници на премиерот Зоран Заев со лидерот на Алтернатива, Африм Гаши, на која, според најавите, треба да се разговара за конкретни ресори, а веројатно и за потенцијални министри од редовите на можниот нов партнер во владината коалиција.
Заев пристигна на средбата повторно придружуван од заменик-министерот за финансии Димитар Ковачевски, кој пред околу час и половина ја поднесе во СДСМ кандидатурата за лидер на партијата.
Во изјавата пред седиштето на СДСМ, Ковачевски нагласи дека верува оти Алтернатива ќе влезе во Владата.
На прашање дали како евентуален мандатар би се согласил Министерството за здравство да го земе Алтернатива, Ковачевски одговори дека за поделба на ресорите би се зборувало откако низ партиските процедури би се одлучило кој ќе биде премиер.
„Јас не можам да го коментирам тоа затоа што по завршувањето на изборот за претседател на партијата следува конгрес, така што низ процедурите на партиските тела се носи таа одлука која на крајот зависи и од коалициските партнери и од парламентот кој ја носи финалната одлука. Дури откако ќе се донесе таа одлука, може да зборуваме за конкретни кадровски решенија и за тоа кој би водел одреден ресор“,
рече Ковачевски.
Претходниот петок Заев ја официјализираше оставката на позицијата лидер на СДСМ, што ја поднесе ноќта на 31 октомври, по завршувањето на вториот круг од локалните избори, по што беа закажани вонредни внатрепартиски избори што ќе се одржат на 12 овој месец.
Пред Ковачевски, кандидатура за нов претседател на СДСМ денеска поднесе и Фросина Ременски, која моментно не е дел од партиското раководство.
Ноќта на 31 октомври, Заев најави оставка и на премиерската функција. Но, откако беа распишани внатрепартиските избори во СДСМ, тој не прецизираше дали и кога би ја официјализирал и премиерската оставка.
Прво треба да завршат преговорите за парламентарното мнозинство со Алтернатива. Ако тоа се заврши и јавно објави, ќе се направи проценка со стабилно и зголемено парламентарно мнозинство, кога ќе се влезе во Парламентот со постапка за избор на влада со Алтернатива, а во зависност од преговорите со Бугарија. Една од најзначајните причини поради кои Алтернатива би влегла во влада е да обезбеди стабилно мнозинство поради почетокот на преговори со ЕУ“,
изјави Заев за Телма.
Попладнево, по пристигнувањето во Клубот на пратеници заедно со Ковачевски, Заев рече дека нема да дава изјави. Гаши, пак, во коментар при пристигнувањето само рече дека не разговараат за кадровски решенија.