Преговорите, според претходното соопштение од Владата, се во фаза на разговори околу можните кадровски решенија за министерските, заменик-министерските и другите функции што би ги добила Алтернатива
Нова средба помеѓу премиерот Зоран Заев и претседателот на Алтернатива, Африм Гаши, треба да се одржи денеска во Клубот на пратеници, потврдуваат и од Владата и од Алтернатива.
„Средба ќе има денеска во 14 часот во Клубот на пратениците, во ист формат како и претходниот пат. И овој пат не се предвидени изјави за медиумите, а за заклучоците од средбата ќе информираме преку соопштение“,
велат од Владата.
Ова ќе биде трета средба помеѓу премиерот и лидерот на Алтернатива, која следува само два дена по претходната на која тие постигнаа „начелна согласност околу програмските цели“ во идната владина коалиција во која би влегла и Алтернатива.
Преговорите, според тогашното соопштение од Владата, се во фаза на разговори околу можните кадровски решенија за министерските, заменик-министерските и другите функции што би ги добила Алтернатива.
„Во деновите што следат, ќе продолжат консултации во партиите, по што ќе следи и нова работна средба помеѓу премиерот Заев и претседателот на Алтернатива, Гаши со нивните тимови“,
наведоа од Владата по средбата во понеделникот.
Гаши на првите две средби доаѓаше во друштво на генералниот секретар на партијата, Беким Сали, кој изминатите денови се споменува како можен предлог на Алтернатива за нов министер за здравство.
Заев, пак, беше во друштво на заменик-министерот за финансии, Димитар Ковачевски, кој отворено најави дека ќе се кандидира за нов лидер на СДСМ, а неговото име во јавноста споменува и како најсериозен кандидат за иден мандатар за состав на нова Влада.
Потенцијалниот владин партнер Алтернатива, според последната изјава на Гаши, нема ништо против Ковачевски да ја предводи идната Влада.
Не е одговорно, рече тој, ние да бараме од друга партија кој ќе биде мандатар или премиер. Како што рече тој, тоа е работа на СДСМ кој е најголема партија и треба да одлучи кој ќе биде нивен претседател или мандатар.