На вечерата ќе ја разгледаме целата ситуација на регионот од геополитички аспект, изјави шефот на дипломатијата на ЕУ, посочувајќи дека Западен Балкан е дел од проблемот, но и од решението
Високиот претставник за надворешна политика на ЕУ, Џосеп Борел, потврди дека идната недела се поканети на вечера лидерите на шест земји од западен Балкан, на разговори за стратегијата на ЕУ во регионот.
Како што јави МИА, иако Борел не даде точен датум, според дипломатите, се очекува вечерата да се одржи на 18 мај (вторник) во Брисел.
Целта на високиот претставник е да ги собере шесте лидери од регионот за да ги слушне нивните мислења за тоа како ЕУ да биде поангажирана и поприсутна во регионот.
Оваа дискусија денеска веќе се одржа со земјите членки на Европската Унија. Борел инсистираше дека е неприфатливо што Западен Балкан две години не се нашол на дневен ред на дебатите на Советот за надворешни работи на ЕУ со кој тој претседава и увери дека нема да дозволи да поминат повторно две години без регионот. Западен Балкан, рече тој, повторно ќе биде на агенда пред летото.
„На вечера, ќе разговараме за целата политичка состојба на Западен Балкан, кој е голем геополитички проблем. Регионот е дел од проблемот и дел од решението. Мора да гледаме на тоа од геополитичка гледна точка и тоа ќе го сториме следната недела со сите лидери од Западен Балкан“,
вели Борел.
Како што јавуваат српските медиуми, тој најави и дека новата рунда од дијалогот меѓу Белград и Приштина ќе се одржи пред крајот на јуни, бидејќи новата влада во Косово побара дополнително време за да се запознае со ситуацијата од претходните рунди.