Според новата парламентарна партија, станува збор за изборен инженеринг
После повеќе од еден месец, од ОЈО сѐ уште нема информации до каде е предистражната постапка за хакирањето на веб-страницата на ДИК по завршувањето на гласањето на изборите на 15 јули, потсети Левица во денешното соопштение.
Од партијата оценуваат дека станува збор за изборен инженеринг
„Бараме ОЈО и МВР јавно да соопштат до каде е постапката за очигледниот инженеринг на денот на изборите, кога првпат, откако во 2006 година ДИК беше дигитализирана, граѓаните не можеа да го следат броењето на гласовите и резултатите, што дополнително го поткопува легитимитет на новата власт чие конституирање беше проследено со низа скандалозни прекршувања на законите и Деловникот“,
се наведува во соопштението на Левица.
Изјавите на претседателот на ДИК, Оливер Дерковски, дека нападот на интернет-страницата немал влијание врз изборниот резултат, според Левица, се ноторни лаги, со оглед на, како што се наведува, скандалозното однесување во целиот процес на оваа висока државна институција, која немаше одговор ниту на прашањето за каква заштита за системот користи.
„Дополнително, сомневањата дека се работи за координиран напад на службите со цел манипулирање на изборните резултат ги подгрева однесувањето на МВР, кое наместо да постапи по службена должност, чекаше пријава од ДИК која пристигна дури наредниот ден“,
велат од Левица.