Директорката на Клиниката за кожни болести која била во Италија, а не ги почитувала препораките за самоизолација и доаѓала на работа, засега може да добие само јавна опомена, велат од Лекарската комора.
За опомената утре ќе одлучува етичката комисија на Комората, а опција за одземање на лиценцата, како што велат, засега нема бидејќи нема судска одлука.
„Во Законот за здравствена заштита не е предвидено дека некој доктор свесно ќе го загрози здравјето на другите, затоа постои Кривичен законик, затоа постојат институции кои ќе се погрижат за тоа. Наше е пред сè апелираме до колегите да се придружуваат до препораките на Светската здравствена организација“,
изјави на прес-конференција претседателката на Лекарската комора Калина Гривчева-Старделова.
Заменик-претседателот на Лекарската комора Елбер Бесими рече дека доколку судските власти донесат соодветна пресуда тогаш Лекарската комора е должна да постапи според одлуките на судот.
Од Основното јавно обвинителство, пак, за „360 степени“ велат дека сѐ уште е рано за кривично-правна интервенција. Во Кривичниот законик постојат две дела – едното е пренесување заразна болест и другото е непостапување по здравствените прописи за време на епидемија. За едното докторката не може да се гони бидејќи во државата нема прогласено епидемија, додека за другото е сè уште рано бидејќи не се знае дали таа некого заразила.
Инаку, откако нејзиното тестирање се покажа позитивно на коронавирус, повеќе од 200 лица од вчера се ставени во домашна изолација, односно сите членови на нејзиното семејство, вработени на Клиниката, пациенти кои биле хоспитализирани, како и учесниците на семинарот кој се одржал во саботата и на кој присуствувале повеќе од 100 гости.
Министерот за здравство Венко Филипче вчера најави дека по изборите директорката ќе биде разрешена од функцијата, а на новинарско прашање дали и кривично ќе одговара, тој ги повика другите институции да реагираат.
Поврзани вести:
ОЈО за „360 степени“: Сѐ уште е рано за кривично-правна интервенција за заразената докторка