На Клиниката за кожни болести во Скопје, веднаш по соопштувањето на веста за заразената директорка, докторите почнаа да ги враќаат пациентите што имаа закажан термин за преглед.
Што ви кажаа?
„Па рече да не влегувате, а ете јас имам закажано за денеска, ми викаат не работиме, не се знае до кога, никој не работи. Како може така одеднаш, ние и од далеку доаѓаме…“
вели пациентка.
Клиниката за дерматовенерологија, која е во ист објект со повеќе други интерни клиники, е под клуч. Пристап имаат само епидемиолозите кои треба да го дезинфицираат просторот и да го оспособат за работа по две недели, кога вработените ќе се вратат од изолацијата во домашни услови.
Докторите што ги сретнавме во кругот на Клиничкиот центар го осудуваат однесувањето на директорката на кожната клиника, Нина Цаца Билјановска, која минатата недела се вратила од скијање во Италија, но наместо да остане во самоизолација и да избегнува контакти со други лица, пет дена одела на работа.
„Прво сметам дека е крајно неодговорно да дојдеш од кризно подрачје каде што секојдневно слушаме дека бројот на инфицирани и забоелни, па и починати од вирусот ковид 19, се зголемува, да не останеш во самоизолација. Колешката доаѓала на работа неколку дена и тоа вака сметам дека може да ја искомплицира ситуацијата, се надевам дека нема дека ќе заврши на ова, но во секој случај сметам дека е неодговорно“.
„Ние треба први да ги почитуваме, ако сме во странство треба да сме во изолација. Ако доаѓаме од тие подрачја да седиме 10-14 дена дома, така се и препораките од министерството“.
„Секој треба да сноси одговорност, за тоа треба други да одговараат, јас не сум надлежна. Јас само сакам да им помогнам на пациентите,а во моментов не сме заштитени медицинскиот персонал. Апелирам прво да бидат затворени училиштата, каде треба да бидат заштитени децата и да се доаѓа на лекраски преглед само со вистинска индикација, зашто денеска имаше по 30 прегледи во секоја амбуланта. Сите пациенти не беа итни, можеби само 5 беа итни.“
Министерот за здравство, Венко Филипче, со кого разговаравме вечерва, вели дека ниеден од оние што биле во контакт со директорката, нема симптоми на коронавирус.
„Ниту еден од таканаречените примарни контакти нема знаци за заболување, пристапуваме по соодветниот алгоритам што важи за сите. Тоа значи сите со коишто пациентот бил во контакт подолго време, а за подолго време се смета време подолго од 15 или 20 минути на растојание од помалку од 1,5 или 2 метри, треба да биде во домашна изолација“,
вели Филипче.
Дали некое од лицата со кои таа била во контакт веќе е тестирано за коронавирус?
„Не, токму тоа е целта на изолацијата. Во овој момент резултатите може да се лажно негативни, бидејќи претстои период на инкубација којшто зависи од првичниот контакт. Кога ќе истече периодот на домашна изолација што е еднаков на периодот на инкубација, одлука е на епидемиолозите дали согласно нината клиничка состојба, согласно општата здравствена состојба, ќе се направи тестирање“,
вели Филипче.
Се чини дека кругот на луѓе со кои таа контактирала е доста широк. Дали сите тие луѓе коишто ги споменавте, пациентите, вработените на клиниката, оние кои учествувале на предавањето викендот, сите ли тие ќе треба да останат во домашна изолација?
„Да. Иако има три степени на ризик согласно времето на потенцијална експозиција, дистанцата, сепак се одлучивме дека сите три категории на контакти ќе бидат во домашна изолација“,
вели Филипче.
Во бројка колку е тоа?
„Стотина учесници на симпозиумот, 64 вработени на Клиниката за дерматовенерологија и 24 пациенти“,
вели Филипче.
Дали е ризик што во истиот објект кадешто е Кожната клиника се сместени и други клиники?
„Ризик е само клиниката и токму затоа ја затвораме. Меѓутоа, другите клиники, останатите соседни клиники не се во ризик“,
вели Филипче.
Филипче вели дека е крајно разочаран од односот на докторката, но поради предизборните ограничувања, сега не може да ја разреши.
Опозицијата, пак, оди еден чекор понатаму и бара кривична одговорност од директорката и политичка од министерот.
„Бараме веднаш неотповиклива оставка да си поднесе најодговорниот за овој случај министерот, Венко Филипче, пуленот на Зоран Заев. Оставка веднаш. Бараме кривична одговорност за директорката на Клиниката за кожни болести Нина Цаца Биљановска според член 205 и 206, каде што во членот 206 став 1 гласи: Тој што за време на епидемија на некоја опасна болест не постапи според прописите или наредбите со кои се определуваат мерки за нејзиното сузбивање или спречување, ќе се казни со парична казна или со казна затвор од една година“,
рече вечерва на прес конференција Дафина Стојаноска, член на ИК на ВМРО-ДПМНЕ.
Филипче не чувствува лична одговорност.
„Не очекувам ништо повеќе од луѓето коишто не се грижат за јавното здравје а тоа е ВМРО-ДПМНЕ, што, впрочем го покажаа во овој изминат период од многу години а вклучително и сега во овој период со несоодветни соопштенија, забелешки и повици“,
вели Филипче.
Околку разрешувањето на директорката?
„Знаете, сега таа е на лекување. Јас прво посакувам да заздрави, да помине лекувањето без последици, а после тоа секако ќе преземеме и соодветни мерки“,
вели Филипче.
Министерот не исклучува можност за преземање дополнителни мерки, како што е евентуално затворање на училиштата.
„Во текот на утрешниот ден имаме состанок на Комисијата за заразни болести, на Комитетот којшто ги прати сите овие збиднувања во врска со коронавирусот, ќе излеземе со дополнителни мерки доколку се предложат“,
вели Филипче.