„Со ваквата реорганизација и рационализација на државниот апарат се добива оптимизиран и ефикасен државен систем, од кој бенефит ќе имаат граѓаните. Недозволиво е граѓаните да штедат, а политичарите и институциите да живеат во благосостојба“, велат од партијата
Од Либерално-демократската партија (ЛДП) „ја поздравуваат“ најавата на лидерот на ВМРО-ДПМНЕ и мандатар за формирање на идната влада, Христијан Мицкоски, околу Одлуката за укинување на економските директори на клиниките, како и идејата за еден Клинички центар.
Од ЛДП велат дека се работи за позајмица на една од програмските определби на ЛДП, која, како што велат, е дел од мноштвото партиски програми за која партијата активно се залага, а која велат дека е истакната на голем број настапи на партиските функционери и претставници во Собранието.
„За истите предлози ЛДП се залагаше и во претходната Влада, а истата веќе има донесено Одлука за имплементација“,
се вели во денешното соопштение од ЛДП.
За предлогот, велат од партијата, уште во 2011 година е посочено дека доколку се воведе, ќе се има придобивка од радикална реформа во, како што велат, гломазните, неефикасни и скапи државни институции, што значи намалување на бројот на пратеници, кратење на министерствата и спојување на институциите од слични сфери.
„Со ваквата реорганизација и рационализација на државниот апарат се добива оптимизиран и ефикасен државен систем, од кој бенефит ќе имаат граѓаните. Недозволиво е граѓаните да штедат, а политичарите и институциите да живеат во благосостојба“,
се додава во соопштението.
Од партијата велат дека во Собранието ќе продолжат да се борат за Македонија да стане една изборна единица со отворени листи за избор на советници за поквалитетни претставници на граѓаните, намалување на паушалите на членовите во управните и надзорните одбори, кои се екстремно високи, и укинување на функцијата заменик-директор.
„Го потсетуваме Мицкоски покрај мерките за намалување на бројката на пратеници, директори, укинување на заменици директори и членови на управни одбори, да размислува и на темата за воведување на една изборна единица на територија на целата држава. Со воведување на една изборна единица и отворени листи значително ќе се подобри и ќе се рационализира изборниот систем“,
додаваат од ЛДП.
Оттаму велат дека го поздравуваат овој обид на владата која доаѓа и додаваат дека ЛДП, како современа и отворена партија на идеи, нема да бара благодарност туку „доследност доколку се позајмат квалитетни решенија од нашите програми од страна на ВМРО-ДПМНЕ, затоа што кога се работи за доброто на граѓаните, сите цели и напори стануваат заеднички“.
Лидерот на ВМРО-ДПМНЕ и мандатар, Христијан Мицкоски најавува укинување на економските директори, заменик-директорите и на дел од институциите, односно кратење на јавната администрација.
Мицкоски вчера рече дека идната влада веќе нема да има организациски или т.н. економски директори во здравствените установи низ Македонија, и оти се работи на уште едно ветување, а тоа е еден Клинички центар. При формирањето на управните одбори, како што рече Мицкоски, има согласност таа бројка да биде за 20 проценти намалена од таа што беше досега. Следен чекор, додаде тој, е укинување на позицијата онаму каде што постои заменик (директор), но најавува и намалување на бројот на пратениците во парламентот од 120 на 90, но за тоа, вели тој, е потребно отворање на Уставот.