Во вторник приквечер, по завршувањето на свечената седница за донесување на законот за ратификација на Северноатлантскиот договор, потпишан од владата на Зоран Заев, знамето на Алијансата и официјално ќе биде подигнато пред зградата на Собранието
Во македонскиот парламент деновиве се прават последните подготовки за свечената собраниска седница во вторник, која треба да биде претпоследна во овој собраниски состав, а на која македонските пратеници ќе го ратификуваат Протоколот за членство на земјава во НАТО.
Според информациите од Собранието, сценариото за одржување на седницата предвидува, по нејзиното завршување, знамето на НАТО да биде подигнато на јарболите пред собраниската зграда, заедно со знамето на Северна Македонија. За таа цел, во текот на денешниот ден, на јарболите пред Собранието пробно се креваше знамето на НАТО.
Седницата ќе почне во 15 часот. Со оглед на тоа што е поканет да присуствува речиси целиот државен и политички врв во земјава, како и гости од седиштето на НАТО и од земјите членки во регионот, се планира седницата да може да се следи и од втората по големина сала во парламентот, покрај салата за пленарни седници.
Северна Македонија, всушност, нема последна да го ратификува Протоколот за својот влез како 30. членка во НАТО, како што е вообичаената процедура на организацијата. Поради тоа што парламентот веќе в среда треба да гласа за самораспуштање, законот „за ратификација на Северноатлантскиот договор“ (како што гласи точката на дневен ред на 133. собраниска седница) ќе се донесе со клаузула за одложено дејство. Поточно, тој ќе стапи во сила откако и Шпанија ќе биде „запишана“ како последната земја членка на НАТО која ќе го ратификува Протоколот за нашата држава, кој беше потпишан пред точно една година во седиштето на Алијансата во Брисел.
Предлог-законот за ратификација на Северноатлантскиот договор, всушност, го донела политичката влада на СДСМ и на ДУИ, на една од последните седници, одржана на 28 декември 2019 година. На предлог-законот, за кој во вторник ќе гласаат македонските пратеници, е потпишан доскорешниот премиер Зоран Заев.
Претседателот на Собранието Талат Џафери, синоќа, во емисија на „Алсат“, рече дека е можно официјализирањето на членството на Северна Македонија во НАТО да се случи среде изборна кампања, но нагласи дека тоа е случајност, затоа што станува збор за процес кој трае подолго време.
„Јас ги направив сите потребни комуникации со дипломатските претставници на Шпанија во Скопје затоа што шпанската влада го достави во парламентот во Мадрид предлог-законот за ратификација на Протоколот за членство на нашата земја во НАТО. Денес или утре, според динамиката во шпанскиот парламент, се избираат работните тела, меѓу кои и Комисијата за надворешна политика, каде што треба да помине предлог-законот за ратификација на Протоколот. Нивниот парламент е дводомен, со Претставнички дом и Сенат и последен е кралот, со чиј потпис стапува на сила законот. Протоколот според процедурите се адресира во Стејт департментот, односно во САД, за да се депонира актот на доставување на Протоколот. Очекувањата се дека некаде до 20 март ќе може да заврши целата оваа постапка“,
рече Џафери.