Косовскиот премиер Курти во интервју за агенцијата Косова прес изјавил дека на Србија не ѝ дал никакви гаранции за формирање Заедница нa српски општини (ЗСО) за да се отстранат барикадите на северот на Косово
Косовскиот премиер Албин Курти изјави дека дека се невистинити шпекулациите објавени во домашните и српските медиуми дека имало некакви тајни преговори со српските власти во врска со одблокирањето на граничните премини меѓу Косово и Србија. Тој во интервју за косовската агенција Косова прес изјавил дека на Србија не ѝ дал никакви гаранции за формирање Заедница нa српски општини (ЗСО) за да се отстранат барикадите на северот на Косово.
„Нема такви гаранции од владата на Косово. Заедницата на општините стана заедница на барикади. Тие сакаат општините да се однесуваат како барикади. Како што направија 16 барикади заедно, тие сакаат да направат 10 општини“,
изјавил тој за косовската новинска агенција Косова прес, пренесе регионалниот сервис на Радио Слободна Европа (РСЕ).
Курти изјавил дека во последните денови имало зголемена посветеност на меѓународните претставници за отстранување на барикадите бидејќи косовската полиција покажала одлучност да ги отстрани, но посочил дека е добро што Србите сами ги отстраниле.
„Ние постојано нагласувавме дека трпението на граѓаните и на владата се исцрпува, затоа им дадовме малку повеќе време и простор на КФОР, но тоа не можеше да трае бесконечно. Сепак, на средбите кои ги имавме забележавме нивно зголемено залагање во правец на укинување на барикадите, затоа во неделата рековме дека е прашање на денови кога ќе се отстранат тие барикади“,
додал Курти.
По 19 дена блокирање на патиштата на северот на Косово, на 29 декември, косовските Срби почнаа да ги острануваат барикадите на неколку косовско-српски гранични премини кои беа поставени по апсењето на еден од поранешните припадници на косовската полиција од српска националност, Дејан Пантиќ.
Барикадите беа отстранети откако на Пантиќ, осомничен за учество во нападот на службениците на Централната изборна комисија на Косово, му беше одреден притвор во домашен притвор.
По ова, денеска беа отворени и двата гранични премини меѓу Косово и Србија, „Јариње“ и „Брњак“.
Претседателот на Србија, Александар Вучиќ изјави дека очекува во првата половина на јануари во Белград да дојдат меѓународни претставници кои ќе инсистираат Србија и Косово да постигнат договор за нормализација на односите меѓу двете страни.