Полицијата наведува дека по речиси три недели првите автомобили поминале на овие премини од територијата на Косово кон Србија и обратно
Граничните премини „Јариње“ и „Брњак“ се отворени денеска, соопшти косовската полиција.
Овие два премини со Србија на северот на Косово се затворени од 10 декември поради влошување на безбедносната состојба откако припадниците на српската заедница подигнаа барикади.
Полицијата наведува дека по речиси три недели првите автомобили поминале на овие премини од територијата на Косово кон Србија и обратно.
Се додава дека полициските службеници на северот на Косово како и на премините ќе продолжат „да ги извршуваат своите должности и законски овластувања во интерес на уставниот поредок“.
Барикадите на административниот премин „Мердаре“ беа отстранети вчера.
Барикадите на граничните премини на северот на Косово првично беа подигнати поради апсењето на поранешниот косовски полицаец Дејан Пантиќ, кој сега е во домашен притвор.
Тоа беше едно од барањата за отстранување на барикадите, а претседателот на Србија, Александар Вучиќ изјави дека добил гаранции од САД и ЕУ дека ќе се исполнат и другите барања на Србите.
Станува збор за барања лицата кои биле на барикадите да не бидат кривично гонети, а КФОР (мисијата на НАТО на Косово) да гарантира дека нема да дозволат влез на косовските специјални единици да одат на север.