Освен тоа, ќе се прави обид со сопирање на протокот на вода во реката Вардар да се намали водостојот и да се олесни потрагата
На третиот ден од потрагата по возачот и евентуални сопатници од автомобилот „голф“ што излета во реката Вардар кај тетовско Желино денеска се вклучени и кучиња трагачи. Освен тоа, ќе се прави обид со сопирање на протокот на вода во реката Вардар да се намали водостојот и олесни потрагата.
Претставниците на надлежните институции проценуваат дека треба да се бара во реката Вардар, но и надвор од тетовското подрачје, во правец кон Скопје и Велес според текот на речната вода.
„Ние побаравме да се намали водата. Од ‘Водостопанство’ во меѓувреме рекоа дека ќе го намалат водостојот. Имаме четири екипи во терен. Првата екипа ни е на левата, втората на десната страна на Вардар, третата кај мостот кај Сиричино и четвртата ќе ја ангажираме денеска после 13 часот во Зелениково, бидејќи претпоставуваме дека поради брзината до таму може да ги влече водата. Имаме 16 нуркачи и 16 вработени од Дирекција за заштита и спасување на терен“,
изјави Ариф Арифи раководител на тетовската секција на Дирекција за заштита и спасување.
Ангажирани се вработени во специјалната антитерористичка единица „Тигри“, другите секции на ДЗС, пожарникари и Општина Желино. Екипа од ДЗС Тетово побарала во текот на денот да ангажира и екипа од ДЗС Велес кои во текот на денот треба да извршат пребарување во малото езеро во Зелениково.
„Го провериме целиот терен каде што ја најдовме колата, па одиме надолу. Вардар носи многу вода и е тешко за побарување. Почнуваме пак да се враќаме назад, затоа што има многу вода и треба да се провери цел терен полека. Водата е многу силна и треба да се пребара и некаде во длабочината, ќе треба многу време“,
изјави Авни Амети, командант на тетовската пожарна.
Во вторникот тетовската полиција доби пријава дека „голф“ излетал во реката Вардар од кај мостот кај Желино. Засега се трага по 22-годишниот кумановец Е.Р, чие семејство го поседува автомобилот. Сè уште се утврдува и дали имало и други сопатници во возилото.
Од вчера во потрагата е вклучен и хеликоптер на МВР, но засега нема резултати.