Главниот координативен кризен штаб го прифатил предлогот на Комисијата за заразни болести и врз основа на епидемиолошките текови и состојби во државата, намалување на бројот на хоспитализирани лица и бројот на заразени лица, препорачува Владата на утрешната седница да ги усвои следните мерки – забраната и посебниот режим на движење на населението и возилата од јавен превоз да почнува од 24 часот до 5 часот.
Соодветно на ова, дозволено време за работа на угостителските објекти за работа со посетители/гости во отворениот дел од угостителскиот објект (само летни тераси, градини, а не во затворениот дел) да биде до 23:30 часот.
Дополнително, сите настани да може да се одржуваат согласно наменските протоколи, со исполнетост до 30 отсто од капацитетот на затворениот простор, а вежбалниците и фитнес-центрите да може да отпочнат со вршење на својата дејност во објектите.
Во однос на згрижувањето деца во градинките, се предлага измени на протоколот, со кој се дозволува зголемување на бројот на деца од 15 на 20 во една група.
На здравствените работници да им се дозволи користење на годишните одмори.
Според предлогот, мерките би почнале да важат од среда од 12 мај до 18 мај 2021 година.