Предлог-мерките в понеделник ќе се разгледуват на состанок на Главниот координативен кризен штаб, а веќе во вторник би се нашле на владина седница, најави министерот за здравство
По реакциите од синдикатите, Филипче вели дека не се размислува за повлекување од предлогот, зашто болниците се преполни со невакцинирани. Сепак, призна дека се уште не е прецизирано како ќе се одвива контролата на вработените во јавниот сектор – дали имаат примено барем една доза вакцина или поседуваат негативен ПЦР-тест
Откако ги обелоденивме новите предлог-мерки на Комисијата за заразни болести, интересот за прва доза вакцина против ковид-19 е зголемен, вели министерот за здравство, Венко Филипче. Од 2 500 заинтересирани граѓани за прва доза неделно, оваа недела бројката се искачи на 7 500, вели тој во настап во емисијата „360 степени“ на ТВ Алсат.
Мерките предвидуваат задолжителна вакцинација на здравствените работници, а за целиот јавен сектор најмалку една доза вакцина, ПЦР-тест или потврда за прележан ковид, што според повеќе синдикални организации е противуставно и обид за присилно спроведување вакцинација. Министерот Филипче вели дека нема отстапување од мерките, оти болниците се преполни главно со невакцинирани пациенти. Тој, сепак, призна дека се уште не е прецизирано како ќе се одвива контролата на вработените во јавниот сектор.
„Треба да разговараме, да видиме кои ќе бидат одговорните лица. Ние ги нудиме сите електронски алатки. Да се симне сертификатот и да се провери кодот. Не е точно дека ова е присилна вакцинација. Апсолутно, имаат право граѓаните да не се вакцинираат и, притоа, еднаш неделно да прават тест на сопствен трошок и да докажат дека се негативни на ковид и тогаш знаеме дека здравјето на сите околу не е загрозено“,
кажа Филипче.
На забелешката дека ПЦР-тестот е скап и дека ќе биде финанасиски товар за вработените, тој одговори дека вакцината е бесплатна и дека така граѓаните го штитат сопственото здравје, здравјето на сите околу нив и здравствениот систем.
„Не можеме да издржиме уште долго вака, да затвораме различни одделенија, други пациенти да трпат, да им се одложуваат операциите, а ние да се занимаваме само со ковид-19. Тоа никаде во светот не се прави. Заболуваат и луѓе кои се вакцинирани од ковид, меѓутоа имаат многу полесна форма на болеста“,
вели Филипче.
Филипче вели дека ризик-факторот за зараза во зима се мултиплицира оти луѓе повеќе време поминуваат во затворен простор.
Предлог-мерките в понеделник ќе се разгледуват на состанок на Главниот координативен кризен – штаб, а веќе во вторник би се нашле на владина седница, најави министерот за здравство.