Во моментот оваа варијанта на вирусот е најфреквентна во Охрид и во Прилеп, велат од МЗ
Кај 45 примероци на брисеви од заразени со коронавирус во земјава е утврдено досега присуство на британскиот сој, во периодот од 1 јануари до 7 февруари, според испитувањата во лабораторијата на ИЦГИБ-МАНУ.
„Првиот пациент со овој тип на вирус во оваа лабораторија е дијагностициран на 13 јануари 2021 во Охрид и оттогаш неговата застапеност прогресивно се зголемува. Во моментот оваа варијанта на вирусот е најфреквентна во Охрид и во Прилеп, а е присустен и кај одредени пациенти во други градови: Тетово, Струга, Куманово, Штип, Велес“,
соопштија од Министерството за здравство.
Од Министерството наведоа дека резултатите се базираат на скрининг за присуство на две мутации кои го карактеризираат овој сој на најголем дел од новозаразените пациенти дијагностицирани во оваа лабораторија (>400), како и со секвенционирање на целите геноми на вирусите детектирани кај >50 од овие пациенти.
„Анализите на МАНУ не утврдија присуство на британскиот сој на вирусот кај вработените на Клиниката за нефрологија, каде што за краток временски период беа заразени повеќе здравствени работници“,
истакнаа од МЗ.