Британскиот сој циркулира кај нас и поради неговите особености веројатно тој ќе стане доминантен, вели д-р Горан Кунгуловски од Лабораторијата за генетика и персонализирана медицина при Клиниката „Жан Митрев“.
„За неколку месеци овој британски сој, бидејќи многу полесно се пренесува од претходните соеви, ќе стане доминантен и во државава и во многу земји. Овој вирус еволуира многу побавно и најверојатно нема да има потреба од сезонска вакцина. Се смета дека се пренесува за 70 отсто побрзо од претходните соеви, односно доколку требало да се заразат десет луѓе ќе се заразат 17 луѓе. Иницијално излегоа податоци дека нема влијание врз смртните исходи, но сега излегуваат податоци за кои треба да се направат и подетални студии, не сакаме да креваме паника, има некои индикатори дека благо е зголемена и смртноста за 30 отсто. Но, за тоа да стане факт треба подетални студии кои ќе бидат рецензирани од експерти за да се излезе со таа информација“,
рече д-р Кунгуловски.
Податоците покажуваат оти новите соеви немаат поголемо влијание врз ефикасноста на вакцините, барем на РНК-вакцините. Затоа, појасни д-р Кунгуловски, треба да бидеме во еден постојан мониторинг и во една постојана фаза на внимателност.
„Сега би оделе со поинаков пристап кога би секвенционирале, би оделе на попроизволно тестирање, бидејќи сега сакаме да знаеме процентуално колку од тие пациенти се носители на британскиот сој, а не селектирано, не таргетирано, а колку на другите соеви и тоа во единица на време во наредните неколку месеци да следиме дали таа превеленца се менува или не односно дали британскиот сој станува доминантен или не. Досега се детектирани илјадници мутации во коронавирусот и најголем дел од нив се неутрални и немаат никаков ефект, некои го ослабуваат некои ги менуваат неговите особености“,
вели тој.
Во врска со детектираната мутација на британскиот сој на вирусот ковид-19 кај 46-годишен маж кој веќе е оздравен, а за што вчера информираа од Клиниката „Жан Митрев“, рече дека морало да има некаков контакт за да се пренесе вирусот.
„Дали пациентот знаел за тој контакт или не знаел тоа останува на епидемиолозите да го утврдат, но многу е поимливо дека од некаде се заразил, дали е донесено преку патување во странство, дали при контакти со луѓе кои биле во странство или вирусот циркулирал недела две три претходно тоа не знаеме, бидејќи немаме доволно податоци. Според сознанијата пациентот бил со средна слика, тој е оздравен без никакви проблеми засега, тоа е добар знак, но тоа е еден индивидуален пациент. Ни требаат податоци за стотици или илјадници пациенти позитивни за новиот и за старите соеви за да направиме релевантна споредба на тие податоци и да излеземе со поверодостојни тврдења“,
вели д-р Кунгуловски.
Според информациите, посочи тој, вакцините функционираат доволно добро и кон новите соеви на вирусот. Додаде дека при студиите се утврдило дека вакцините кои се неверојатно добри ги поминале сите фази на студии, имаат солидна ефикасност и ја неутрализираат појавата на сериозна болест при инфекција со коронавирусот.