Во болниците во земјава вкупно се лекуваат 276 пациенти со ковид-19, покажува статистиката од Министерството за здравство за изминатите 24 часа.
На Инфективната клиника во изминативе 24 часа се примени 8 пациенти, со што вкупно таму има хоспитализирани 79 лица. На кислородна поддршка се 43 лица.
Во ГОБ „8 Септември“ се примени 6 нови, со што вкупно хоспитализирани се 21 пациент и нема ниту еден на респираторна машина.
Во болницата во Козле се хоспитализирани 13 возрасни пациенти позитивни на ковид-19, 2 позитивни деца, 2 мајки и 2 деца суспектни на вирусот.
Во болницата во Битола се хоспитализирани 12, а во болницата во Штип се хоспитализирани 48 пациенти. На инфективните одделенија во Тетово, Охрид, Велес, Куманово, Прилеп, Гостивар, Струмица и Струга се хоспитализирани 116, позитивни и сомнителни на ковид-19.
Инфективната клиника уште во јуни го смени начинот на лекување на пациентите со ковид и престана да ги става на респиратор.
Како што изјави тогаш директорката на клиниката Милена Стевановиќ за „Слободен печат“, нивното искуство и искуството во светски размери покажало дека интубирањето и ставањето на апарат за вештачко дишење не дава резултати во лекувањето на болните од ковид-19.
„Сфативме дека и покрај ставањето на апарати за дишење ги губиме пациентите. Неуспесите беа повеќе од евидентни пред се заради специфичната патофизиологија на болеста и нејзината непредвидливост. Се покажа дека апаратот за вентилирање најчесто не помага кај пациентите со ковид-19. Во таа насока одат и светските искуства. Наместо на апарати за дишење пациентите се ставаат на неинванзивна вентилација со помош на маски. Овој начин на третман бара и уште поголем ангажман на здравствениот персонал бидејќи здравствената состојба на пациентот треба да се следи од минута во минута и да се реагираа со соодветна терапија доколку настане промена“,
вели Стевановиќ за „Слободен печат“.
За оваа промена на пристапот во лекување се координирале и со анестезиолозите од КАРИЛ кои, како што вели, имаат поголемо искуство во лекување на пациентите во тешка состојба.
Министерот за здравство Венко Филипче на почетокот на неделава на прес-конференција рече и дека се намалува бројот на хоспитализирани пациенти, повикувајќи се на редовниот неделен извештај на Институтот за јавно здравје.
Намалувањето е видливо и ако се погледнат дневните извештаи на Министерството за здравство. Така, на 13 август во болниците во земјава имало 367 пациенти, на 15 август 354, на 22 август тој број паднал на 291, а денеска нивниот број е 276.