„Тоа што некој сака да провоцира тоа е негов проблем. Ние точно знаеме што е нашата историја. Ние точно знаеме што е нашата култура. Ние точно знаеме што е нашиот македонски јазик, сега веќе признат во целата Европска Унија“, рече премиерот коментирајќи ги наводите на одредени бугарски историчари, според кои, македонскиот преродбеник Кирил Пејчиновиќ бил Бугарин
Тоа што некој сака да провоцира тоа е негов проблем. Ние точно знаеме што е нашата историја, порача премиерот Димитар Ковачевски коментирајќи ги изјавите на одредени бугарски историчари, според кои, македонскиот преродбеник Кирил Пејчиновиќ бил Бугарин додавајќи дека историчарите треба да се занимаваат со историја, а политичарите со политика.
По повод канонизацијата на Кирил Пејчиновиќ во Лешочкиот манастир од страна на МПЦ-ОА, претходно проф. д-р Пламен Павлов од Историскиот факултет на Универзитетот во Велико Трново „Св. Свети Кирил и Методиј“, рече дека Пејчиновиќ бил бугарски преродбеник.
„Тоа што некој сака да провоцира тоа е негов проблем. Ние точно знаеме што е нашата историја. Ние точно знаеме што е нашата култура. Ние точно знаеме што е нашиот македонски јазик сега веќе признат во целата Европска Унија. Во тоа наскоро ќе се уверат сите граѓани кога ќе го потпишеме договорот Фронтекс со ЕУ и со македонски идентитет веќе преговараме со ЕУ“,
нагласи Ковачевски.
Премиерот додаде дека присуствувал на богослужбата по повод канонизацијата на Кирил Пејчиновиќ која ја опишува како чин со кој го негуваме македонското духовно и културно наследство.
Ковачевски уште еднаш повтори дека комуникацијата меѓу Северна Македонија и Бугарија се одвива на официјално ниво помеѓу претставници на институциите, односно луѓе од политиката, но посочи дека секогаш постојат и други интереси и личности кои сакаат да ги нарушат односите помеѓу двете држави.
„Обично со свои изјави предизвикуваат негативни чувства, предизвикуваат нешто што јас го нарекувам провокација“,
посочи премиерот.
„Треба да бидеме смирени бидејќи имаме многу јасна преговарачка рамка со ЕУ каде што историските прашања за коишто сега ме прашавте се дел од работата на историската комисија во која што има 14 историчари по седум од двете страни и тие историчари заедно со консензус мора да ги донесат сите решенија. Значи, не може без кој било од тие историчари што се во комисијата да се донесе кое било решение и јас на историчарите им препорачувам тие да се занимаваат со историјата, политичарите ќе се занимаваат со политиката и на тој начин ќе имаме и добри добрососедски односи и побрз напредок на државата во полноправно членство во ЕУ“,
истакна тој.
Премиерот истакна дека Владата има јасен став по однос на сите прашања коишто може да се сметаат за провокација и додаде оти институциите треба да работат во рамки на своите надлежности и да ги спроведуваат законите на територијата на државата без разлика на кого се однесуваат тие закони.
Веста дека Македонската православна црква го канонизирала за Македонец преродбеникот Кирил Пејчиновиќ, проф. д-р Пламен Павлов од Историскиот факултет на Универзитетот во Велико Трново ја коментираше како богохулење и апсолутно кршење на билатералниот протокол меѓу Бугарија и Северна Македонија.
„Македонската православна црква долго време размислува за канонизација на Пејчиновиќ. Тоа не е невообичаено. РСМ на ист начин ги третира Гоце Делчев, Даме Груев, Цар Самуил и цела плејада наши заеднички народни херои. Во случајот со Кирил Пејчиновиќ, а со и Јоаким Крчовски – за кој се подготвуваат да го канонизираат, со овие наши рани преродбеници се случува токму истото непочитување на историјата, склоно кон чиста рамнодушност. Овие луѓе имаат бугарска самосвест – Кирил Пејчиновиќ вели дека „пишува на својот љубезен и наједноставен бугарски јазик“ – секаде се појавува како Бугарин, а би било смешно да се тврди нешто друго“,
вели проф. Павлов.