Премиерот и лидер на СДСМ вели дека во партијата има дефинирана процедура во однос на кандидирање на претседателски кандидат и дека тој процес сè уште не е започнат. Меѓутоа, како што додаде тој, сите кандидати имаат еднакви шанси во „би рекол, тој натпревар да ја добијат честа да бидат претседателски кандидат на Социјалдемократскиот сојуз на Македонија“
Секој член на Социјалдемократскиот сојуз на Македонија (СДСМ) кој ги исполнува критериумите може да биде кандидиран или да се самокандидира за претседател на државата, вели премиерот и лидер на владејачката партија СДСМ, Димитар Ковачевски.
Тој денеска беше прашан дали зачестените појавувања на неговиот претходник на челната позиција во Владата и во партијата, Зоран Заев, е знак дека се подготвува за кандидат за претседател на претстојните претседателски избори догодина.
Во однос на присуството на Заев на јавни настани, Ковачевски одговарајќи на новинарското прашање рече дека не гледа причина зошто некој кој претходно извршувал високи државни и партиски функции да не се појавува во јавноста.
„Дури за мене е и позитивно доколку бивши претседатели, бивши премиери, бивши претседатели на Собранието се појавуваат, бидејќи тоа сепак се луѓе кои имаат искуство, коишто имаат знаење кое може да го споделат со поличарите, со деловната заедница, па и со граѓаните во однос на нивното гледање, а додека некои како, на пример, поранешниот претседател на Владата, којшто формирал своја фондација, често гледаме дека донира финансиски средства за поддршка на најразлични групи на граѓани. Вчера тоа беше во делот на поддршка на една од институциите коишто функционираат во државата“,
изјави Ковачевски пред медиумите по денешната посета на „Пивара Скопје“.
Инаку, настанот кој го спомена Ковачевски е донацијата што експремиерот и претседател на СДСМ, Зоран Заев, сега во својство на директор на Фондацијата „Заев“, вчера ја предаде на Министерството за внатрешни работи, а се состои од шест мотоцикли наменети за МВР и полицијата.
Продолжувајќи во насока на изборот за претседателски кандидат, Ковачевски посочи дека во СДСМ има дефинирана процедура во однос на кандидирање на претседателски кандидат и дека тој процес сè уште не е започнат.
„Секој член на партијата којшто ги исполнува критериумите, а тие се наведени во статутот и во правилниците кои важат во партијата, може да биде кандидиран или да се самокандидира, што се случувало во партијата во минатото, а потоа низ дебата од месните организации, преку општинските организации до раководството – Извршниот одбор и Централниот одбор, се носи одлука за тоа кој ќе биде претседателски кандидат на партијата, се разбира и претседателски кандидат на коалицијата којашто ќе настапи на изборите. Процесот сè уште не е започнат, меѓутоа сите кандидати имаат еднакви шанси во, би рекол, тој натпревар да ја добијат честа да бидат претседателски кандидат на Социјалдемократскиот сојуз на Македонија“,
рече Ковачевски.
Инаку, во јавноста како потенцијален кандидат на СДСМ за иден шеф на државата често се споменува името на актуелниот министер за внатрешни работи Оливер Спасовски, кој вчера ја прими донацијата од Фондацијата „Заев“.
Од опозициската ВМРО-ДПМНЕ, пак, според недоманешната изјавата на партискиот лидер Христијан Мицкоски, кој ќе биде нивниот фаворит во трката за претседател ќе биде познато на почетокот на следната година.
Според Мицкоски, досега се искристализирале 22 имиња, но во периодот што следува тој список ќе биде намален.
Пратеничката и професорка по уставно право Гордана Силјановска-Давкова и поранешниот пратеник и професор по уставно право Александар Спасеновски се две од имињата што во ВМРО-ДПМНЕ се вртат како можни претседателски кандидати на изборите што треба да се одржат следната година.
На Силјановска-Давкова ова би ѝ била втора кандидатура, откако во 2019 годна загуби во претседателската трка од актуелниот шеф на државата Стево Пендаривски.
На Спасеновски, пак, би му бил прв обид да стане претседателски кандидат.
На оваа тема Силјановска-Давкова говореше во интервјуто за „360 степени“ емитувано вчера на МРТ1. Таа рече дека размислува околу претседателската кандидатура, но истовремено дека има и многу дилеми.