За време на официјалното отпочнување на изградбата на пругата од источниот дел на железничкиот Коридор 8, Ковачевски кажа дека е свесен оти кај граѓаните постои скептицизам дека пругата кон Бугарија некогаш ќе биде изградена, но додаде дека единствената опција која постои е удвојување на напорите со соседите и со ЕУ за овој проект да стане реалност
„Пругата наречена надеж“ е сосема прецизна формулација за проектот железница кон Бугарија, рече премиерот Димитар Ковачевски од местото Шупли Камен во близина на Куманово каде што денеска официјално започна изградбата на источниот дел од железничкиот Коридор 8, секција Куманово – Бељаковце – Крива Паланка.
Ковачевски кажа дека е свесен оти кај граѓаните постои скептицизам дека пругата кон Бугарија некогаш ќе биде изградена, но додаде дека единствената опција која постои е удвојување на напорите со соседите и со ЕУ за овој проект да стане реалност.
„Можеме секако да зборуваме зошто нешто не можело или како требало да се направи. Но имаме и опција да избереме да работиме и да одиме напред, да го избереме најдобриот пат, или во случајов најдобрата пруга кон европската иднина. Денеска затоа велам дека рехабилитацијата и зафатите на Коридорот 8, железничката пруга која ја поврзува Република Северна Македонија со Република Бугарија стануваат реалност“,
посочи Ковачевски.
Освен што земјава е клучна точка на поврзување и кон Европа и кон Јадранското и Црното Море, со овој проект, посочи Ковачевски, нашата држава станува и реална крстосница на Балканот, отворајќи простор за раст, развој и напредок на повеќе полиња.
„Оваа инвестиција на Северна Македонија ѝ отвора нови европски рути за железнички превоз, воспоставува регионално поврзување со пристаништата во Бургас и Варна во Бугарија и пристаништето Драч во Албанија што е од исклучителна важност за нашата економија но и генерално за соработката на регионот во целина како и соработката на регионот со други региони во Европа“,
истакна премиерот.
Освен економски развој на земјата и регионот, Ковачевски посочи дека очекува оти изградбата на долгоочекувата пруга кон Бугарија да придонесе и кон подобрување на регионалното поврзување и регионалната соработка.
Ковачевски нагласи дека пред нас престстои процес на реформи за железничкиот транспорт и ја искористи приликата да се заблагодари на партнерите од Европската Унија, кои, како што рече, ни овозможија преку заеднички проекти да ја отпочнеме изградбата на модерна и ефикасна железничка мрежа во регионот.
„Европската Унија е наш партнер во процесот на реформи, европскиот пристап, начин на работа и живот – сè она кон кое целиме, а тоа секако вклучува модернизиран железнички сообраќај кој ќе ја олесни комуникацијата помеѓу земјите во регионот. Токму затоа овој проект е особено важен како за нас, така и за нашите соседи“,
нагласи премиерот.
На отпочнувањето на изградбата на источниот дел од железничкиот Коридор 8 присуствуваше и бугарскиот премиер Галaб Донев порача дека тој е важен за сите три земји, како за Бугарија, така и за Албанија и Северна Македонија и дека без сомнеж ќе придонесе за додадена вредност на развојот на целиот наш регион.
„Коридорот 8 беше желба на многу генерации од двете страни на границата како клучна врска меѓу граѓаните и бизнис секторот од трите земји Бугарија, Северна Македонија и Албанија. Изградбата на Коридорот 8, кој поврзува три земји сојузници на НАТО е од интерес и за заедничката регионална безбедност, но истовремено ќе придонесе и за зголемување на трговската и стокова размена меѓи земјите“,
изјави Донев.
На настанот присуствуваа и евроамбасадорот во земјава Дејвид Гир и Анди Аранитаси од Европската банка за обнова и развој (ЕБОР) кои посочија дека ЕК и ЕБОР ќе инвестираат повеќе од милијарда евра во проширувањето на железничката линија од Северна Македонија до Бугарија, со што ова е убедливо најголемата инвестиција што ЕУ ја направила во земјава.
Повторната изградба опфаќа работа на првите две од трите проектирани делници на источното крило на железничкиот Коридор 8, во вкупна должина од 88,2 километри (од Куманово до Бељаковце – 31 километар, од Бељаковце до Крива Паланка – 34 и од Крива Паланка до граница со Бугарија – 24 километри).