Одговарајќи на новинарски прашања, како ја коментира содржината на писмото и до кога мисли дека меѓународната заедница ќе ги толерира состојбите во судството и корупцијата, премиерот им укажа на новинарите што Владата досега направила во делот на судството, но и не пропушти да ја нападне опозицијата дека блокирала одредени законски решенија во Собранието
Писмото од американската амбасадорка Анџела Агелер, испратено до Владата и судовите, во кое таа изразува загриженост за состојбите во судството е испратено секаде каде што е потребно и содржи одредени случаи за кои што јас, за жал, можам да кажам дека навистина се одолговлечени, изјави денеска премиерот Димитар Ковачевски.
Одговарајќи на новинарски прашања, како ја коментира содржината на писмото и до кога мисли дека меѓународната заедница ќе ги толерира состојбите во судството и корупцијата, премиерот им укажа на новинарите што Владата досега направила во делот на судството, но и не пропушти да ја нападне опозицијата дека блокирала одредени законски решенија во Собранието.
„Ние мора да разграничиме дека во државата имаме независна власт. Ова писмо се однесува на правосудните органи. Како Влада јас секогаш сум кажувал дека стоиме на располагање за унапредување на законодавството во делот на сите закони кои што треба да се направат. Имаме нов Кривичен законик, во Собранието поднесовме низа закони кои се однесуваат на судството и на правобранителството. Најголемиот дел од тие закони се блокирани од страна на опозицијата, во делот на платите на судиите, во делот на судската академија. Одговор може да ви дадат од опозицијата зошто ги блокираат тие закони“,
рече Ковачевски во изјава по „Самит Македонија 2025“.
Тој нагласи дека Владата правела сè што е потребно за унапредување на судството.
„Дел од судниците се дигитализираа, веќе едната е пуштена во употреба, Владата прави се она што може за унапредување на судството. Има една работа што дополнително може да се направи, а тоа е да се вклучи повеќе Собранието, политичките партии во комуникација со судовите бидејќи и по Устав и по закон судиите, односно членовите на Судскиот совет се избираат во Собранието, подоцна тие ги избираат судиите. Сметам дека треба да се воведат подетални мерливи показатели за работата на секој поединец во правосудната фела, бидејќи јас не би генерализирал за тоа дали нешто комплетно не функционира или комплетно функционира бидејќи сепак се работи за систем во којшто постојат поединци од кои дел подобро ја извршуваат својата работа, дел не ја извршуваат добро својата работа, дел треба да ја унапредат својата работа, дел можеби треба да бидат освежени со нови кадри. Меѓутоа, сепак, тоа не е дел од ингеренциите на Владата“,
рече премиерот.
Тој оцени дека писмото содржи одредени случаи за кои што „јас за жал можам да кажам дека навистина се одолговлечени, постапката оди со враќање од повисоки кон пониски инстанци во повеќе наврати и сепак тоа се прашања за судиите кои што работат и за оние кои што управуваат со работата на судиите“.
На прашањето дали се согласува со констатациите на амбасадорката Агелер, Ковачевски одговори кратко: „Да“.
Писмото од Агелер, денеска го коментираше и претседателот Стево Пендаровски.
„Во однос на писмото кое се споменува во медиумите кое американската амбасадорка го има пратено до нашите институции, можам да коментирам само врз основа на медиумските написи што сум ги видел. Претпоставувам дека станува збор за опис и критика на состојбите во делот на правосудството на фонот на она што американската амбасадорката го зборува неколку месеци назад, меѓутоа не можам да зборувам во детали бидејќи такво писмо до мене не е доставено“,
рече шефот на државата.
На 11 април американската амбасадорка во земјава Анџела Агелер испратила писмо до институции на извршната и судската власт во С Македонија во кое ја изразува својата и загриженоста на Соединетите Американски Држави за состојбите со правосудството.
Загриженоста на која реферира амбасадорката се однесува на првостепените пресуди против високопрофилирани личности кои Апелацискиот суд ги укина и ги врати на повторно судење, поради што, во меѓувреме, застареа дел од предметите кои се водеа против некои од обвинетите.
Во писмото биле истакнати и напорите на владата на САД да помогне во подобрување на состојбите во правосудниот систем на земјава и вложените половина милијарда евра за реформи во судството.