На средбата со албанскиот претседател се зборувало и за иницијативата „Отворен Балкан“ која според Ковачевски не е алтернатива за членството во ЕУ туку може да биде од сериозна помош при пристапување во Унијата
Северна Македонија и Албанија исполнија сè, на ред е ЕУ, рекол мандатарот и лидер на СДСМ, Димитар Ковачевски, на средба со албанскиот претседател Илир Мета, кој е во посета на земјава.
„Република Северна Македонија и Република Албанија, како соседни пријателски земји, делат исти вредности и имаат заедничка иднина. Таа заедничка иднина е во ЕУ и убеден сум дека наскоро и двете земји ќе ги започнат преговорите за членство во Унијата, затоа што и Северна Македонија и Албанија досега исполнија сè што од нив беше побарано, сега на ред е ЕУ“,
вели Ковачевски.
Тие зборувале и за интензивирање на соработката и преку иницијативата „Отворен Балкан“ која според идниот премиер е важна, со оглед дека носи можности за економски раст и развој. Меѓутоа, како што соопштија од СДСМ, Ковачевски истакнал дека „Отворен Балкан“ не е алтернатива за членството во ЕУ туку може да биде од сериозна помош при пристапување во Унијата.
„Ковачевски најави и интензивирање на инфраструктурите проекти на Коридорот 8, што ќе обезбеди подобро поврзување на Северна Македонија и Албанија“,
соопштија од СДСМ.
Мета, пак, го поздравил напредокот на земјата, како и концептот „Едно општество за сите“.