Ова е првиот Самит на ЕУ што се организира во регионот на Западен Балкан и тоа во Албанија, што, како што посочуваат од Владата, уште повеќе ја зголемува неговата важност и значење
Премиерот Димитар Ковачевски утринава во Тирана беше пречекан од премиерот на Албанија, Еди Рама, каде што денеска се одржува Самитот на ЕУ и Западен Балкан.
Ова е првиот Самит на ЕУ што се организира во регионот на Западен Балкан и тоа во Албанија, што, како што посочуваат од Владата, уште повеќе ја зголемува неговата важност и значење.
„ЕУ покажа силно партнерството кон земјите од овој регион, со што уште еднаш потврди дека во нас гледа партнер од доверба. Самитот е одлична можност да се продолжи оваа успешна соработка за надминување на заедничките предизвици како што се обезбедување на храна, енергенси, закана од хибридни напади и миграција, бидејќи само со цврсти меѓусебни врски помеѓу земјите од Западен Балкан и Европската Унија можеме да дејствуваме како едно, исклучиво во интерес на граѓаните и перспективите на државите“,
се наведува во соопштението од Владата.
Лидерите од Западен Балкан денеска ќе имаат можност да дискутираат за европската иднина на целиот регион заедно со европските челници, меѓу кои, претседателот на Советот на Европа Шарл Мишел, претседателката на Европската комисија Урсула фон дер Лајен и шефовите на европските држави.
На денешниот Самит во Тирана телекомуникациските оператори од земјите од Европската Унија и Западен Балкан треба да потпишат декларација со која ќе се овозможи намалување на цените за роаминг меѓу ЕУ и регионот во 2023 година.