Помина времето кога во државата се правеа избори секоја година само затоа што некој сака да спроведува само своја лична политичка агенда, вели премиерот
Парламентарни избори ќе има во 2024 година и тие ќе бидат редовни. Помина времето кога во државата се правеа избори секоја година само затоа што некој сака да спроведува само своја лична политичка агенда. Никој не се плаши од избори затоа што бевме на избори во август, истакна денеска премиерот Димитар Ковачевски одговарајќи уште еднаш на повикот на опозицијата следната година да има избори.
Според него, опозицијата нема конзистентен став.
„Опозицијата имаше избори во август оваа година. Тоа беа локални избори во општините Маврово и Ростуше, Центар Жупа и во Тетово. И таму се потврди дека тоа што го прават дека водат на анкетите е само за себе и за своето членство. Се потврди дека доживеаја најголем пораз, дека во Центар Жупа и покрај тоа што сакаа да направат бојкот уште еднаш не успеаја и во Општина Тетово каде што велеа дека ќе победеле 6:0 имаа послаб резултат од тоа што го имаа на последните локални избори“,
рече Ковачевски додавајќи дека е убеден оти СДСМ и коалицијата ќе победи и на претседателските и на следните парламентарни избори.
Тој нагласи дека пред точно една година ВМРО-ДПМНЕ победи на локалните избори и освои 50 општини во државата.
„Тие освоија локална власт во главниот град во државата. Она што треба да прават е да се фатат за работа“,
рече премиерот.
Според него, она што 11 години ѝ се случуваше на земјава сега му се случува на Скопје, потенцирајќи дека во 2015 година тогашната влада оставила неисплатени субвенции, а изградила 36 споменици во главниот град.
„Единаесет години, кога владееја со државата таа беше според сите меѓународни институции прогласена за заробена држава, просечната плата беше 9 000 денари, а сега е 11 000 денари. Единствено што ги интересираше е да прават споменици. Таква катастрофа што ѝ се случи на Македонија во 11 години сега му се случува на Скопје. Така како што успеаја да ја заглават државата 11 години, ниту еден милиметар во европски интеграции, раскарани внатре, раскарани со сите соседи, сега тоа се случува во Скопје. Затоа јас би им порачал власта што имаат во Скопје да земат да ја практикуваат, затоа што денес едвај излеговме од Скопје бидејќи на протест се сите превозници. Во Скопје ветуваа бесплатен автобуски превоз, ветуваа бесплатен автобус, ветуваа брда и долини. Во моментов Скопје ниту има автобуски превоз, ниту има пречистителна станица за вода, ниту има какво било поместување на кој било капитален проект, кој им го остави минатата власт која изгуби и предаде власт на ВМРО-ДПМНЕ“,
рече Ковачевски.
Според него, не може на ВМРО-ДПМНЕ да му биде изговор дека се скарале со градоначалничката, која е нивен кандидат, бидејќи тие ја промовираа во Скопје.
„Не може сега ‘знаете, се скаравме и за да можеме добро да го управуваме Скопје ни требаат парламентарни избори’. Не поминува таа работа. Нека се фатат за работа за да можат да профункционираат општините“,
рече Ковачевски.