Ковачевски го повтори ставот дека криминалот на Онкологија е мултипартиски и мултиетнички и повеќепати нагласи дека нема да има пардон за никого, без разлика на која политичка партија припаѓа. Повика случајот да не биде политизиран бидејќи, како што рече, на некој начин, тоа ќе значи прикривање на некого
Сите што се огрешиле во случајот „Онкологија“, ако сакаат нека бидат членови и на свети СДСМ, и на света ВМРО-ДПМНЕ, и на света ДУИ, има да одговараат. Пардон нема да има за никој во овој случај. Ова денеска го изјави премиерот Димитар Ковачевски коментирајќи ги наводите за злоупотреби на терапиите за лицата болни од рак на Клиниката за онкологија, а за кои МВР и Обвинителството отворија предистрага.
Ковачевски го повтори ставот дека криминалот на Онкологија е мултипартиски и мултиетнички и повеќепати нагласи дека нема да има пардон за никого, без разлика на која политичка партија припаѓа.
„Ова е еден грозен случај во којшто Министерството за внатрешни работи има определено тим којшто работи на прибирање на обемен доказен материјал. Нема да има пардон за никого без разлика дали припаѓа на која било политичка партија, на каква било припадност. Се работи за мултипартиски, мултиетнички криминал којшто мора да се расчисти. Очекувам да се спроведе професионална брза истрага која што ќе идентификува поединци коишто се огрешиле и пред законот и пред моралните и етичките принципи на докторската фела“,
изјави Ковачевски одговарајќи на новинарски прашања откако учествуваше на поставување камен-темелник за доградба на ООУ „Коле Неделковски” во Општина Центар.
Премиерот повика случајот да не биде политизиран бидејќи, како што рече, истрагата ќе биде спроведена на најпрофесионален можен начин, а политизирањето, на некој начин, ќе значи прикривање на некого.
„Истрагата којашто е во тек се прави професионално, опфатени се поголем број на материјали на лица за да се утврди точно кои се виновниците, што точно имаат направено и после да се процесуираат согласно законите во државата. Доста беше 30 години граѓаните да бараат борба со криминалот и корупцијата“,
додаде Ковачевски.
Во истрагата што ја спроведува МВР, додаде премиерот, учествуваат и директорката на Клиниката за онкологија и министерот за здравство – кадри кои се избрани за време на неговиот мандат.
Протестот што треба да се одржи попладнево, а на кој вчера се повика преку социјалните мрежи, според премиерот, е добредојден бидејќи, како што вели, на тој начин се врши дополнителен притисок врз институциите за побрзо расчистување на случајот.
Претходно денеска и владејачката ДУИ повика на итна и темелна истрага за сомнежите за криминал на Онкологија и апелираше политичките партии да не ги компромитираат и да се држат настрана од истрагите за случајот.
За потсетување, неделникот „Фокус“ минатиот период објави серија текстови за постоење разработена криминална бизнис-мрежа за препродавање на скапи лекови – цитостатици. Во мрежата, наводно, биле вклучени повеќе лекари и медицински персонал на Клиниката. Во системот, според пишувањата на неделникот, се внесувале фиктивни пациенти, а на дел од вистинските пациенти им се давала половична терапија и на тој начин скапата биолошка терапија завршувала на црниот пазар.
По ваквите информации, Основното јавно обвинителство Скопје отвори предистрага и во петокот попладне влезе во Клиниката. Вчера соопштија дека претреси биле направени и во два приватни стана во Скопје. а биле одземени компјутери, компјутерски податоци и друга документација кои понатаму ќе се анализираат и вештачат.
*Други поврзани вести:
- ОЈО Скопје и полицијата ја „тресат“ Клиниката за онкологија: Се прибираат докази во рамки на предистражна постапка
- Обвинителство: Одземени се компјутери и друга документација од Клиниката за онкологија и приватни станови во Скопје
- Меџити очекува брза истрага по наводите за злоупотреби на Клиниката за онкологија
- Бесрамен и криминален начин на заработка врз грбот на пациентите, вели заменик-министерката Манолева за случајот со Онкологија
- Лекарската комора за Онкологија: Ниту еден пациент не заслужува злоупотреба на терапијата за лична корист
- ВМРО-ДПМНЕ: Бизнисот со лекови на Онкологија бил возможен само со знаење на високи структури во клиниката и во власта
- Ковачевски за Онкологија: Ваквиот тип на криминал е мултипартиски и мултиетнички
- Пендаровски: Згрозувачки се сомнежите за злоупотребите на Онкологија, крајно време е системот да се справи со криминалот
- Спасовски за случајот „Онкологија“: За вакво злосторство нема толеранција, виновниците имаат име и презиме и тие мора да бидат утврдени
- Ја уверуваме јавноста дека сите наводи за „Онкологија“ ќе бидат истражени, а евентуалните виновници ќе бидат соодветно гонети, велат од Обвинителство
- ДУИ: Политичките партии да не ги компромитираат и да стојат настрана од истрагите за „Онкологија“