Премиерот на прес-конференцијата нагласи дека откако ќе завршат консултациите сите документи ќе бидат испратени до парламентот, како и дека на Собранието е да одлучи дали ќе донесеме одлука да ги почнеме преговорите или не
Не треба повеќе да чекаме, да ја искористиме историската шанса за напредок на државата и преговори за членство во ЕУ, порача премиерот Димитар Ковачевски на заедничка прес-конференција со претседателот на Европскиот совет, Шарл Мишел кој денеска е во официјална посета на Скопје, зборувајќи за францускиот предлог за надминување на спорот со Бугарија и старт на преговорите со Унијата.
„Да ја искористиме историската шанса за напредок на државата, да размислуваме рационално мудро и одговорно. Да мислиме на иднината на нашите деца. И досега не беше лесно, но сега е дојден момент кога ќе ја оставиме дневната политика настрана и ќе се држиме до фактите и официјалните документи кои се достапни. Ве уверувам дека доследно се држиме до државните позиции во однос на преговорите со Бугарија, го штитиме националниот интерес и македонскиот идентитет“,
рече Ковачевски.
Сите одлуки, додаде премиерот, досега беа тешки, но донесоа огромни придобивки и затоа, според него, треба да се искористи оваа единствена можност за исполнување на стратешката цел за полноправно членство во Унијата.
Објаснувајќи го ставот зошто повеќе не треба да се чека, премиерот меѓу причините го наведе тоа што во предлогот има чиста формулација за македонскиот јазик.
„Со овој предлог сите шпекулации кои алудираат на спротивности се лажни и невистинити. Ние Македонците сме горди на својата историја, на својот јазик, на својот идентитет со сите негови аспекти. Македонскиот народ ниту некој успеал да го асимилира ниту некој го асимилирал ниту некогаш ќе се случи да го асимилира и тоа е факт. Модифицираниот европски предлог ги става и билатералните историски прашања надвор од преговарачката рамка, отворените прашања со соседите треба да бидат затворени, да, но за тоа ќе имаме време сè додека истите не се достоинствени и праведни за двете страни“,
додаде премиерот.
Протоколот помеѓу Република Северна Македонија и Република Бугарија, нагласи понатаму Ковачевски, не е нотиран во преговарачката рамка, тоа е билатерален документ кој не е дел од европскиот пакет.
„Европскиот предлог и протоколот се два различни неповрзани процеси кои во моментов временски коинцираат. Друга важна работа е што преговарачкиот процес, односно меѓувладината конференција и скринингот ќе можеме да ги реализираме без одлагање и дополнителни услови. Овој конечен европски предлог овозможува безусловен старт на пристапните преговори“,
рече Ковачевски.
На прес-конференцијата со Мишел тој нагласи дека преговорите со ЕУ ќе можеме да ги почнеме веднаш по донесувањето на нашата одлука за прифаќање на предлогот од француското претседателство.
Меѓутоа, за тоа ќе се изјасни и Собранието откако Владата до пратениците ќе го достави европскиот предлог и билатералниот протокол кој исто така најави дека ќе биде објавен јавно.
„Откако ќе заврши консултативниот процес што го води владата, ќе биде презентиран билатералниот протокол со Република Бугарија, сите документи кои се јавно објавени и уште еден ќе бидат испратени во Собранието. Во Собранието се застапени претставници на сите парламентарни политички партии и тие таму ќе имаат состаноци на коишто ќе учествуваат нормално претставници од нивните редови и коишто треба да расправаат по однос на заклучоците во врска со европскиот предлог којшто го имаме добиено од ЕУ. Сметам дека и претседателот Мишел беше многу јасен во својата експликација дека ние имаме предлог којшто ни овозможува веднаш започнување на преговорите со ЕУ. На Собранието е да одлучи дали ќе донесеме одлука да ги почнеме преговорите и со какви заклучоци и за тоа треба да разговараат претставниците на политичките партии, и како такво да го дадат на Владата да спроведе и да операционализира во врска со одлуката којашто Собранието ќе ја донесе“,
рече Ковачевски.