Покрај обврските кои ги имаат надлежните министерства, нагласи Ковачевски, за сите големи проекти од типот на проектот за изградба на Коридорот 8, во голем дел се јавува потреба од мислења и на други институции кои не се во надлежност на ресорното министерство, а се во надлежност на Владата. Од тие причини, како што рече, за координирање на таквите активности се назначува еден од вицепремиерите на Владата
Назначувањето на првиот вицепремиер Артан Груби за координатор на изградбата на неколку инфраструктурни проекти, меѓу кои и Коридорот 8, не е никаква дополнителна одговорност или надлежност, туку единствено координација за ефективно спроведување на работата која е во исклучива надлежност на Министерството за транспорт и врски и институциите во негови рамки.
Ова на денешната прес-конференција во Владата го изјави премиерот Димитар Ковачевски кој одговараше на прашање зошто првиот вицепремиер е назначен за координатор на изградбата на Коридорот 8 наместо тоа да го врши, пред сè, ресорното Министерство за транспорт и врски.
Покрај обврските кои ги имаат надлежните министерства, нагласи Ковачевски, за сите големи проекти од типот на проектот за изградба на Коридорот 8, во голем дел се јавува потреба од мислења и на други институции кои не се во надлежност на ресорното министерство, а се во надлежност на Владата.
Од тие причини, додаде премиерот, за координирање на таквите активности се назначува еден од вицепремиерите на Владата.
„На пример, вицепремиерот за економски прашања, господинот Фатмир Битиќи, ги координира сите активности кои се во исклучива надлежност на економските ресори – Министерство за финансии, Министерство за економија, Министерство за земјоделство, координира во делот на државна помош, странски инвестиции, домашни инвестиции итн. Тој не презема нивни надлежности и обврски, туку ги координира активностите со други институции кои треба да воспоставуваат мислења или да ја сработат работата којашто е потребна за ефикасно и ефективно завршување на некоја постапка“,
кажа Ковачевски.
Како пример го посочи и вицепремиерот за европски прашања Бојан Маричиќ за кого кажа дека во исто време е и шеф на Секретаријатот за европски прашања и дека ја координира активноста на сите институции и министерства во однос на претставувањето на земјава пред институциите во Брисел.
По забелешката дека Груби е министер за политички систем и односи меѓу заедниците, а е назначен да координира инфраструктурни проекти, новинарите го прашаа Ковачевски какви сè квалификации има првиот вицепремиер за да врши и координација од ваков тип.
Премиерот на ова одговори оти Груби бил претседател на Комитетот за преговори за изградба на коридорите 8 и 10-д.
„Вицепремиерот Груби во изминатите две години беше претседател на Управувачкиот комитет за Коридорот 8 и како што гледате, Коридорот 8 има избран проектант, изведувач, надзор и веќе започнаа работите, односно подготвителните активности за изградбата на Коридорот 8, а за неколку недели ќе почнат физичките работи и за Коридорот 10-д кој ќе биде означен со настан на кој ќе бидат повикани и медиумите“,
заклучи Ковачевски.
Владата на вчерашната седница одлучи да го назначи првиот вицепремиер и министер за политички систем и односи меѓу заедниците Артан Груби за координатор на изградбата на Коридорот 8.
Тој во улога на координатор ќе ја следи и реализацијата на патните правци Скопје – Блаце, Кичево – Букојчани, железницата Кичево – Лин и заедничките гранични контроли со Албанија и Косово.
Ваквата одлука, како што посочија вчера од Владата, е со цел навремена реализација на сите овие проекти.