Лидерот на ВМРО-ДПМНЕ, пак, попладнево, на средба со амбасадорката на Обединетото Кралство, ја повторил оценката дека „новиот состав на владата на СДСМ нема легитимитет од страна на граѓаните да владее“
По изборот на новата Влада, претседателот на СДСМ и мандатар Димитар Ковачевски ќе упати покана до лидерот на ВМРО-ДПМНЕ Христијан Мицкоски за средба на која би се се разговарало за актуелните прашања, како и да се изнајде решение за закони од интерес на граѓаните.
„Вечерта кога бев избран за претседател на СДСМ, а Мицкоски реизбран за лидер на ВМРО-ДПМНЕ, имавме телефонски разговор дека по изборот на нова Влада ќе се видиме и ќе разговараме за актуелната состојба“,
рече Ковачевски во „Топ тема“ на Телма.
Тој смета дека политичарите треба да ги здружат сите сили, и на ниво на партија, на ниво на коалиција, но и на држава и сите да дадат придонес кон најдобро и најбрзо решавање на проблемите.
„Сметам дека сите ресурси, особено на Владата, но и на парламентот, треба да бидат насочени во носење закони и решенија за пребродување на кризата, но и закони во насока на поддршка на компаниите и граѓаните“,
рече Ковачевски.
Мицкоски, пак, попладнево имал средба со амбасадорката на Обединетото Кралство во земјава, Рејчел Галовеј, на која тој, како што соопштија од ВМРО-ДПМНЕ, оценил дека „новиот состав на владата на СДСМ нема легитимитет од страна на граѓаните да владее“.
Мицкоски, како што се соопштува, укажал дека немањето на стратегија, визија и план од претседателот на СДСМ, Димитар Ковачевски, и поставување на стари истрошени кадри на позиции лошо ќе се одрази врз реформите.