Изјавата на Ковачевски и посетата на Османи на Албанија доаѓа откако Македонци од Албанија обвинија дека Бугарија вршела асимилација на македонското малцинство, меѓу другото и со продажба на бугарски пасоши
Премиерот Димитар Ковачевски ќе разговара со неговиот албански колега Еди Рама за проблемите на Македонците во Албанија на престојниот самит на Отворен Балкан во Белград.
Одговарајќи на новинарско прашање Ковачевски рече дека нема сомневање оти Македонците во Албанија ќе можат слободно да ја изјаснат својата етничка припадност на пописот.
„Ние како држава сме секогаш присутни меѓу нив. Врз основа на пописот, секој од нив ќе може слободно да се изрази во Албанија како Македонец, нормално. Секој притисок, доколку таков постои, не треба да подлегнуваат на него, а Албанија знам дека ќе го направи пописот врз основа на сите највисоки стандарди на Европската Унија и на Евростат, сигурно дека ќе спречи било какви притисоци во поглед на било какво влијание врз било кој граѓанин, без разлика на неговата етничка припадност“,
рече Ковачевски, посочувајќи дека Македонците во Албанија веќе имаат своја партија, пратеник во Парламентот и градоначалник.
Шефот на дипломатијата, Бујар Османи денеска беше во посета на Голо Брдо, Требиште и Пустец во Албанија и се сретна со истакнати активисти и претставници на македонското национално малцинство и носителите на локалната власт.
Како што соопшти МНР, во фокусот на разговорите била положбата на македонското национално малцинство во Албанија и поддршката на институциите на Северна Македонија во тој контекст.
Изјавата на Ковачевски и посетата на Османи доаѓа откако Македонци од Албанија обвинија дека Бугарија вршела асимилација на македонското малцинство, меѓу другото и со продажба на бугарски пасоши.