„Министерот Османи потенцира дека ќе подготви информација до Владата и акциски план, како Северна Македонија и нејзините институции можат преку конкретни проекти да им помогнат на Македонците во Албанија“, велат од МНР
Министерството за надворешни работи инфомира дека министерот Бујар Османи денеска оствари работна посета на Требиште и Пустец во Албанија, при што се сретна со истакнати активисти и претставници на македонското национално малцинство и носителите на локалната власт.
Во фокус на разговорите, посочуваат од МНР, беше положбата на македонското национално малцинство во Албанија и поддршката на институциите на Северна Македонија во тој контекст.
„Министерството за надворешни работи останува во комуникација со македонското национално малцинство во Албанија за прашања кои ги засегаат Македонците овде и активно е ангажирана за заштита и промовирање на нивната етничката, културна и јазична посебност“,
нагласи Османи по средбата.
Од МНР додаваат оти министерот ги издвоил проектите финансирани од Министерството и владините стипендии за студирање во Северна Македонија, како конкретна форма на помош во таа насока.
„Министерот Османи потенцира дека ќе подготви информација до Владата и акциски план, како Северна Македонија и нејзините институции можат преку конкретни проекти да им помогнат на Македонците во Албанија“,
посочуваат од МНР.
На средбата со претставниците на Требиште се разговарало околу можностите за промена на работното време на граничниот премин Требиште-Џепиште, како исклучително важно за прашање за македонското население во регионот на Голо Брдо, проширувањето на соработката меѓу локалните единици од двете страни на границата и поттикнување на економската и културната соработка.
Во таа насока, министерот ја издвоил иницијативата „Отворен Балкан“, која меѓу другото, подразбира отворање нови или ревитализирање на постојните гранични премини, а потенцирал дека преминот Требиште – Џепиште ќе придонесе за уште поголема флуктуација на населението што ќе овозможи подобрување на севкупните прилики во овој крај.
При посетата на Пустец, Мала Преспа, министерот Османи се сретнал со претседателот на Македонската алијанса за европска интеграција, Васил Стерјоски, градоначалникот Пали Колески и директорот на основното и средно училиште Трајан Вангеловски, во кое учениците посетуваат настава на македонски јазик.
„Се разговараше за подобрување на условите за живеење и беа разгледани повеќе проекти поврзани со комуналното уредување на општината. Ја истакнаа потребата од натамошно зголемување на можностите за студирање на високо образовните институции во Северна Македонија, која се спроведува повеќе децении“,
стои во соопштението од Министерството за надворешни работи.
Оттаму додаваат дека во рамки на престојот во Пустец, Османи ќе го посети спомен куќата на писателот Стерјо Спасе, проект кој во рамките на ИПА програмата на ЕУ беше реализиран од страна на Битолскиот завод – музеј и Дирекцијата за култура на Корча.