На средбата, латвискиот претседател Левитс и премиерот Ковачевски ја констатираа потребата од итна евроинтеграција на Северна Македонија, а претседателот на Република Латвија, истакна дека членството на Западен Балкан во ЕУ е прашање на геополитичка одржливост за самата Европска Унија
Претседателот на Владата на Република Северна Македонија, Димитар Ковачевски денеска одржа средба со претседателот на Република Латвија, Егилс Левитс кој е во официјална посета на нашата земја до сабота.
Во разговор со латвискиот претседател Левитс, премиерот Ковачевски потенцираше дека Северна Македонија високо го цени ставот на Латвија оти од витално значење е продолжувањето на процесот на евроинтеграција на Северна Македонија со одржување на Меѓувладина конференција што е можно поскоро и оти прашањата со Бугарија треба да се решаваат по пат на дијалог и разбирање, надвор од пристапниот процес.
Претседателот на Република Латвија Егилс Левитс на средбата истакна дека членството на Западен Балкан во ЕУ е прашање на геополитичка одржливост за самата Европска Унија во време и во околности предизвикани со руската инвазија на Украина.
Тема на средбата меѓу премиерот Ковачевски и претседателот на Латвија, Левитс, меѓудругото беше и војната во Украина за која беше истакнато дека е брутално кршење на меѓународното право и неиспровоцирана воена агресија на Русија врз една суверена држава и дека дипломатијата и дијалогот се неопходни за запирање на воените дејствија.
На средбата присуствуваа и вицепремиерката задолжена за политики за добро владеење, Славица Грковска и министерката за одбрана Славјанка Петровска, а беше нагласено дека од воспоставувањето на дипломатските односи пред 26 години, двете земји негуваат исклучително пријателски и блиски односи со силен фокус на динамизирање на политичкиот дијалог и на трговската размена.