Ковачевски најави дека ќе се залага за држава со независен судски систем и владеење на правото согласно принципите на ЕУ и за силни институции со еднаков третман за сите граѓани
Целта на СДСМ и коалицијата е да обезбедиме поквалитетен живот и иднина која ќе ги задржи нашите деца тука во Македонија. Да обезбедиме иднина на среќни и задоволни луѓе во сопствената татковина, а единствен начин да изградиме таква иднина е членството во Европската Унија, порача на вечерашниот митинг во Сопиште лидерот на СДСМ Димитар Ковачевски.
Осврнувајќи се на тоа што владата сработила досега, Ковачевски нагласи дека изминатите седум години се соочиле со многу предизвици.
„Поминавме три светски кризи, имавме подеми и падови но сепак, во ниту еден момент, не се откажавме и цело време бевме со граѓаните. Ги зголемивме минималната и просечната плата, ги зголемивме пензиите. Обезбедивме намалување на невработеноста, одвоивме пари за антикризни мерки и за поддршка на граѓаните и на компаниите. Свесен сум дека тоа не е доволно, знам дека можеме повеќе, знам дека имаше грешки и не беше се идеално и верувајте дека се знам и ќе дадам се од себе тие грешки да бидат поправени“,
рече Ковачевски.
Тој истакна дека е горд на тоа што успеале да го задржат европскиот курс на земјата, што Македонија станала членка на НАТО и ги отпочнала ппреговорите со ЕУ.
Според Ковачевски, само СДСМ е партија која може да предводи обединување на граѓаните и државата.
„Додека јас зборувам за проекти, други креираат тензии и се обидуваат да потпалат меѓуетнички тензии. Сакам да им порачам на сите, ова не е Македонија на закани, конфликти и нетрпеливост од 2001 година. Ова е Македонија од 2024 година. Македонија која горда и силно чекори кон рамноправно членство во ЕУ и враќање од тоа назад нема. Секоја блокада не е само стагнација, тоа е враќање назад, назад до 2001 и којзнае каде во минатото. Само СДСМ и коалицијата може да предводи обединување на граѓаните и на државата зад една заедничка идеја, идеја за европска иднина. Само ние ја имаме таа обединувачка моќ, за подобра и безбедна иднина на граѓаните“,
порача лидерот на СДСМ.
Ковачевски најави дека ќе се залага за држава со независен судски систем и владеење на правото согласно принципите на ЕУ и за силни институции со еднаков третман за сите граѓани.
„Нема веќе злоупотреби за лично богатење и системски неправди. Затоа ќе има ветинг за судиите, за обвинителите, пратениците, министрите, директорите и за сите други раководители. Ќе излезе на виделина кој работел чесно, а кој ја злоупотребувал позицијата за да се богати на грбот на граѓаните. Ќе има и ред и правда“,
рече тој.
За неговиот опонент Христијан Мицковски, оцени дека е новиот Никола Груевски кој „исто како неговиот ментор и тој ќе го одложува патот кон ЕУ“.
„Исто како Груевски и Мицковски ќе ни изгуби уште 11 години од нашите животи, од животите на нашите деца, на нашите внуци. Време кое едноставно веќе го немаме за губење. ДПМНЕ како што видовме, нуди етнички тензии и изолација, а СДСМ нуди пат кон ЕУ“,
рече Ковачевски, додавајќи дека одлуката на парламентарните избори е помеѓу заглавување во минатото со ВМРО-ДПМНЕ и неоткажување од иднината со СДСМ.