Премиерот денеска и од собраниската говорница на седницата за пратенички прашања повтори дека францускиот предлог е неприфатлив за земјата и дека нема да дозволи јазикот и идентитетот да бидат предмет на преговори
Претседателот на Владата Димитар Ковачевски на седницата за пратенички прашања ги нагласи позициите искажани и во Брисел, за целосна заштита на националните интереси на граѓаните и на државата.
Тој уште еднаш го повтори ставот што го искажа на прес-конференцијата во Брисел по Самитот ЕУ-Западен Балкан во врска со францускиот предлог за надминување на разликите што ги има Република Бугарија со нас и рече дека за него, за претседателот на државата, за коалициските партнери и за граѓаните не се прифатливи идеите кои не прават јасна заштита на македонскиот јазик, македонскиот идентитет и кои во мултилатерални преговори со ЕУ ќе бидат исклучиво за прашања кои се поврзани со мерит-системот, односно да не вклучуваат билатерални прашања во мултилатерални рамки.
„Уште еднаш пред сите граѓани на државата повторувам дека историските прашања не можат и не треба да бидат критериуми за преговарачка рамка и преговорите за Северна Македонија со ЕУ, или со која било друга организација. Второ, преговорите со ЕУ мора да започнат со одржување на меѓувладина конференција, пред да бидат отпочнати измени на Уставот со цел внесување на Црногорците, Хрватите, Бугарите, граѓаните кои така се самоопределуваат, кои тоа го бараат, да станат дел од преамбулата од Уставот. И трето дека и ЕУ и Бугарија ќе достават гаранции дека нема да постојат понатамошни условувања во однос на нашиот процес за пристапување кон ЕУ“,
рече Ковачевски.
Нагласи дека доколку се постигне разбирање на овие позиции Владата е подготвена да се вклучи во разговори со сите партнери во ЕУ.
„Исто така сакам да повторам дека како секоја друга држава, којашто верува во ЕУ, така и ние сакаме и треба да влеземе гордо со сите наши различности, кои ќе ги почитуваат другите во однос на нас, исто како што ние ги почитуваме сите туѓи различности и со сета почит за своите и туѓите лингвистички и историски различности. Ништо повеќе, ништо помалку“,
рече премиерот Ковачевски.
Тој посочи дека Македонија има усогласено 45 проценти од законодавството со европското законодавство, дека е пример за соживот во државата, како што е пример за успешна регионална соработка.
„Тука би сакал да ја истакнам и иницијативата ‘Отворен Балкан’, која не претставува никаква замена за членство во ЕУ, туку е практична имплементација на четирите слободи: за слободно движење на луѓе, капитал, стока и услуги. Добро е што ЕУ тоа го поддржува, добро е што САД тоа го поддржува. Со Отворен Балкан нема веќе тензии, нема разговори за минатото, туку само за иднината. Ние сме земја членка на НАТО и земја којашто во целост ја има усогласено својата надворешна политика со политиката на ЕУ. Ние сме Европа и нашето место е во Европа и еден ден гордо со крената глава ќе станеме членка на ЕУ“,
порача премиерот на седницата за пратенички прашања во македонското Собрание.