Важно е да се остават партиските интереси настрана и да се здружат напорите да се најде компромис за потребните реформи и да се стават национални интереси над партиските. Да се биде дел од ЕУ не е во интерес само на Владата, тоа е во интерес на граѓаните, тоа е во интерес на државата, порача европратеничката и лидерка на прогресивната алијанса на социјалдемократи во Европскиот парламент, Ираче Гарсија Перез
Северна Македонија припаѓа во Европската Унија, таа е дел од европското семејството, но вашата иднина е во ваши раце и во волјата на собранието и на граѓаните. Важно е да се остават партиските интереси настрана и да се здружат напорите да се најде компромис за потребните реформи и да се стават национални интереси над партиските. Да се биде дел од ЕУ не е во интерес само на Владата, тоа е во интерес на граѓаните, тоа е во интерес на државата. Ова го порача европратеничката и лидерка на прогресивната алијанса на социјалдемократи во Европскиот парламент, Ираче Гарсија Перез, по нејзината денешна средба со премиерот Димитар Ковачевски.
„Сега е најдобро време за заеднички да се работи и затоа дојдов да пратам јасна политичка порака од нашето политичко семејство. Јас сум претседател на втората најголема политичка група во Европскиот парламент со повеќе од 150 пратеници, но не само во Европскиот парламент, ние имаме силно влијание во европските институции. Работиме посветено за да ја поддржиме оваа нова динамика со пристапните преговори. Тука сум да го поддржам овој процес и да ви честитам за постигнувањата. Навистина беше потребно лидерство за да се донесат вакви тешки одлуки, но вредат затоа што може да донесат подобра иднина за граѓаните на Северна Македонија. Она што Северна Македонија и Албанија го прават е јасен пример за целиот регион за Западен Балкан“,
рече Гарсија Перез.
Таа, исто така, ја потенцираше и важноста од прогресивното лидерство во време на криза.
„Начинот на кој се грижат за луѓето, ги зголемуваат просечните плати, нудат субвенции за електрична енергија и за основни производи. Важно е да се посвети внимание на сето тоа, ние и на европско ниво работиме на тоа. Важно е да се има социјална агенда за да се поддржуваат социјално ранливата категорија луѓе“,
додаде Гарсија Перез.
Премиерот Ковачевски, пак, се осврна на отпочнувањето на преговорите на 19 јули, кое рече дека означува ново поглавје во односите со ЕУ, за скрининг-процесот кој очекува да заврши за 14 месеци и за договорот со Фронтекст со кој се потврди заштитата на македонскиот јазик и идентитет. Целта е, рече, полноправно членство во ЕУ, како награда на овој европски пат кој нема да биде лесен.
„Сега само и единствено од нас зависи овој европски пат, односно зависи од 120 пратеници во Собранието кои се претставници на граѓаните, а граѓаните сакаат подобар живот, сакаат земјата да е члленка на ЕУ, децата да им останат дома и тука да си ја градат својата иднина“,
рече Ковачевски.
Тој кажа дека ЕУ се покажа како партнер од доверба и ги исполни своите ветувања, потсети на посетата на Фон дел Лајен која вети 80 милиони евра за справување со енергетската криза. Ги претстави и владините мерки во тој контекст, кои. како што вели, покажаа дека сме одговорна Влада која се придржува до социјалдемокартските принципи преку зголемување на минималната плата, на платите и пензиите со крајна цел зголемување на животниот стандард на граѓаните и заштита на најранливите категории граѓани.
„Тоа е суштината на социјалдемократијата, суштината на вакво водење на влада и навистина сум задоволен и горд што овие наши напори дадоа резултат изминатиов период, но воедно и беа препознаени како ефикасни од Европската Унија по што следеше и нивната поддршка. Но, следи и идна поддршка, особено за проекти во енергетскиот сектор, бидејќи ние сме вклучени во заедничката набавка на енергенси на ниво на ЕУ, нашите министри веќе учествуваат на состаноци со министрите од земјите членки на ЕУ со кои сум сигурен ќе обезбедиме забрзана енергетска трансформација на земјата и можност да ги искористиме одговорно ресурсите со кои располага земјата, за наша заедничка подобра иднина”,
додаде премиерот Ковачевски.
На прашањето дали ако во земјата биде завршен условот за уставни измени може да се гарантира дека Бугарија нема да воведе нови услови кон Северна Македонија, Гарсија Перез рече дека не може да даде гаранција за она што бугарската влада ќе го стави на агендата.
„Не можам да гарантирам за тоа. Но, можам да гарантирам дека како група ќе работиме во Европскиот парламент да имаме добра соработка, да ги консолидираме овие важни преговори. Тоа е тоа што можам да го гарантирам, дека ние ќе работиме на тоа. Имаме силна позиција како политичка група и мора да ви кажам дека имаме сила позиција за Северна Македонија и нејзиното пристапување. Важно е да се сфати дека кога зборувате за уставните измени тоа е суверена одлука, избор за граѓаните и за собранието на Северна Македонија“,
додаде таа.
Според неа, опозицијата за ова прашање мора да има јасен став.
„Не може да бидете против се постојано, мора да имате алтернатива. Ако не го делите тој став мора да кажете кој е вашиот став. Сега не е време да се игра со партиски прашања сега е време да се сфати дека е од национален интерес е да се работи на ова“,
рече Гарсија Перез.