Според него, доказ за значењето на земјава е и тоа што вчера првпат се одржа состанок на Советот за стабилизација и асоцијација во Скопје, од неговото прво заседание пред 22 години во Брисел
Денешното одржување на дијалогот на високо ниво за нормализација на односите меѓу Белград и Приштина во Охрид се најголема потврда дека Северна Македонија во овој момент е фактор на стабилност на Балкано. Тоа го потврдивме преку нашето зачленување во НАТО, преку отворањето на преговорите со ЕУ и преку тоа што земјава е претседавач со најголемата регионална безбедносна организација – ОБСЕ во веројатно најтешката година за Европа по Втората светска војна, изјави во интервју за МИА премиерот Димитар Ковачевски.
„Ние сме пример дека низ дијалог и низ дипломатски средства во 21 век треба да се решаваат предизвиците помеѓу соседните држави. Очекуваме разговорите, коишто се водат практично за нормализација на односите помеѓу Косово и Србија, да бидат добар во дух и на крајот да резултираат со интеграција на целиот регион во Европската Унија“,
нагласи премиерот.
Според него, доказ за значењето на земјава е и тоа што вчера првпат се одржа состанок на Советот за стабилизација и асоцијација во Скопје, од неговото прво заседание пред 22 години во Брисел.
„Советот испрати многу јасни пораки за тоа дека нашата држава напредува во процесот на европските интеграции. Разговаравме во детали за се она што го направивме во текот на изминатата година. А изминатата година на полето на евроинтеграциите за нас е една од најуспешните. После 17 години чекање успеавме да ги отпочнеме преговорите со Европската Унија, да ја одржиме првата Меѓувладина конференција, минатата година го потпишавме Договорот со Фронтекс каде што за првпат македонскиот јазик заедно со сите други 24 јазици на ЕУ стои на еден ист договор потпишан помеѓу нашата држава и ЕУ“,
потенцира Ковачевски.