Имаме уверување од Европската Унија дека ќе го интензивира својот ангажман на сите нивоа за поддршка на политичката, економската и социјалната трансформација на Северна Македонија. Во делот на реформите, Владата е подготвена да работи заедно со европските партнери на унапредување на социјалните и економските реформи и на опиплив напредок во владеењето на правото, рече премиерот
Во однос на уставните измени што треба да се направат, со цел внесување на Бугарите во Уставот, а кои се услов за продолжување на преговорите со Унијата, Ковачевски потенцира дека и двајцата високи претставници на Унијата биле многу јасни дека Северна Македонија има усвоена преговарачка рамка со ЕУ и минатиот јули ги отпочна преговорите, преку првата фаза скрининг, но поради неодговорно, неодлучно и нестратешко однесување на опозициските партии во државата, првпат може да се случи самите себе да се блокираме
Денеска со европските партнери имавме можност да направиме пресек на состојбите, да го утврдиме направениот прогрес на земјата, како и спроведените реформи, во подготовката за нашето членство во Унијата. Можам одговорно да кажам дека имаме целосна поддршка од Европската Унија, со недвосмислена посветеност за успех во нашиот следен исчекор во процесот на европските интеграции, за динамичен преговарачки процес и за полноправно членство во Европската Унија, изјави премиерот Димитар Ковачевски на заедничката прес-конференција во Владата со високиот претставник на ЕУ за надворешни работи и безбедносна политика и потпретседател на Европската комисија, Жозеп Борел, и еврокомесарот за соседска политика и проширување Оливер Вархеји.
„Чест ми е што денеска сум домаќин на 16-тиот состанок на Советот за стабилизација и асоцијација во Република Северна Македонија, којшто за првпат се одржува во нашата земја, со што има и историска димензија. На состанокот е поздравен нашиот силен фокус кон реформите и усогласувањето на законите и праксите со европските стандарди. Поздравени се и политиките на добрососедство, што ги водиме преку зрел и одговорен пристап, базиран на меѓусебно почитување и дијалог, со отфрлување на популизмот како штетен на овие искрени намери и провоциран од трети страни кои немаат добри намери, за европерспективите на Западен Балкан. Република Северна Македонија практикува европски вредности и немаме сомнеж дека одиме по исправниот европски пат“,
изјави премиерот Ковачевски.
Ковачевски нагласи дека тој и Владата веруваат дека Северна Македонија во моментов има политички капацитети кои можат да придонесат, по успешно завршениот скрининг-процес во ноември, со динамично темпо да влезе во преговарачкиот процес и до 2030 година да стане членка на ЕУ.
„Имаме уверување од Европската Унија дека ќе го интензивира својот ангажман на сите нивоа за поддршка на политичката, економската и социјалната трансформација на Северна Македонија. Во делот на реформите, Владата е подготвена да работи заедно со европските партнери на унапредување на социјалните и економските реформи и на опиплив напредок во владеењето на правото. На состанокот се согласивме дека во делот на правото мора да има независност, професионалност, транспарентност и непристрасност на судските авторитети и затоа заеднички ги охрабруваме правосудните органи за видлив напредок на овој план, што е очекување и потреба, пред сѐ, на граѓаните на нашата држава“,
рече премиерот.
Во однос на уставните измени што треба да се направат, со цел внесување на Бугарите во Уставот, а кои се услов за продолжување на преговорите со Унијата, Ковачевски потенцира дека и двајцата високи претставници на Унијата биле многу јасни дека Северна Македонија има усвоена преговарачка рамка со ЕУ и минатиот јули ги отпочна преговорите, преку првата фаза скрининг, но поради неодговорно, неодлучно и нестратешко однесување на опозициските партии во државата, првпат може да се случи самите себе да се блокираме.
„Една од одлуките што ние треба да ја донесеме до финално зачленување во ЕУ е усвојување на уставни амандмани со двотретинско мнозинство. Ќе повторам, иако сум кажал повеќе пати. Ова не е процес на еден човек, една политичка партија или една влада, ова е процес за целата држава. Обврска е на сите политички партии и пратеници во Собранието да се носат одлуки со кои се обезбедуваат стратешки цели на државата, а тоа е членство во ЕУ. Длабоко сум уверен дека во Собранието постои капацитет и визија да се донесат потребните одлуки со коишто државата ќе го продолжи и успешно ќе го заврши зачленувањето во ЕУ“.
рече Ковачевски одговарајќи на новинарско прашање.
Тој посочи дека веќе е во формирање работна група за уставни измени во Министерството за правда, во која ќе бидат вклучени експерти по уставно право и експерти предложени од политичките партии, вклучително и од опозицијата.
„Од страна на Владата сите предуслови за вклучување на опозицијата во сите процеси за интеграција во ЕУ, вклучително и носењето на амандманите во уставните измени, се направени. На опозицијата е да размислува стратешки и она што декларативно го кажува да го спроведе и во пракса“,
изјави Ковачевски.