Лидерот на СДСМ вели дека техничката влада била воведена со договор на четирите најголеми партии и дека само така може и да се укине. Алијанса за Албанците, нагласува тој, има поинаков став од ВМРО-ДПМНЕ која го бара укинувањето
Опозициската партија официјално го поднесе предлогот со кој пратениците би ја укинале техничката влада, а претседателот на Собранието, Талат Џафери, денеска ја закажа седницата на чиј дневен ред е овој предлог за 10 февруари
Тоа што ВМРО-ДПМНЕ бара да се укине техничката влада, која раководи 100 дена пред парламентарни избори, според лидерот на СДСМ и премиер Димитар Ковачевски е потврда дека во моментов имаме комплетно демократизирани институции, демократски напредок на општеството, слободни медиуми и слободни граѓани.
Во гостувањето на јавниот сервис МРТ1 тој посочи дека техничката Влада беше воведена затоа што институциите тогаш беа партизирани и злоупотребувани во изборни цели.
„Со барањето за укинување на техничката Влада, нема поголема потврда дека денеска имаме демократизирано општество и слободни медиуми. Во однос на самото укинување техничката Влада, таа одлука е донесена преку договор на четирите најголеми партии и тоа е единствениот начин таа да биде и укината. Низ еден процес на разговор помеѓу политички партии кои ја донесоа одлуката за техничка Влада, треба да се разговара и за нејзиното укинување. Видовме дека коалицискиот партнер на ВМРО-ДПМНЕ, Алијанса за Албанците има различно мислење од ВМРО-ДПМНЕ и затоа треба да се седне на маса да се разговара, да се види предлогот и да се донесе заедничко решение за начинот на укинување на техничката влада. Тоа е одговорен пристап“,
рече Ковачевски.
Опозициската партија официјално го поднесе предлогот со кој пратениците би ја укинале техничката влада, а претседателот на Собранието, Талат Џафери, денеска ја закажа седницата на чиј дневен ред е овој предлог за 10 февруари.
Техничката влада беше воведена како модел за време на преговорите меѓу партиите во Пржино, за излегување од големата политичка криза по откривањето на аферата со масовното нелегално прислушување, односно пред предвремените парламентарни избори во 2016 година. Оттогаш во земјава имаше две преодни влади: првата беше предводена од техничкиот премиер Емил Димитриев од ВМРО-ДПМНЕ, а на чело на втората преодна влада пред изборите во 2020 беше Оливер Спасовски од СДСМ.