Солидарен фонд како помош за оштетените граѓани и компании, но и ослободување од плаќање фирмарина во следните две години се дел од препораките на портпаролот на СДСМ, и актуелен пратеник од Струмица, Коста Костадинов со цел да се надмине загубата предизвикана од пожарот во трговскиот центар „Глобал“.
„Пред сè како човек, секако и како поранешен советник и в.д.градоначалник на општина Струмица, чувствувам должност и обврска да ги повикам моите струмичани на солидарност, која во Струмица секогаш постоела. Се приклучувам на апелот на премиерот Зоран Заев да сите оние компании кои располагаат со механизација и човечки капацитети, се вклучат и помогнат при самото расчистување на ТЦ ‘Глобал’. Секако сите да се солидаризираме и да помогнеме во заживувањето на економијата во самиот Глобал и на луѓето кои лебот го вадат од таму“,
напиша Костадинов на Фејсбук.
Неговата препорака е општината да формира солидарен фонд и согласно капацитетите и законските можности да им помогне на оштетените граѓани и компании. Предлага и општината да ги ослободи оштетените од закупнина до моментот на целосно санирање на штетите.
„Сите ние кои сме ја добиле честа од граѓаните да ги претставуваме, независно дали функцијата е централна или локална, а сме од Струмица први да придонесеме во солидарниот фонд“,
вели Костадинов.
Според него, има оправданост и за свикување итна седница на Советот на општината.