Повикот доаѓа по предупредувањата на таканаречениот „Организациски совет за блокади“ од Србија кој објави дека на 6 септември се планираат блокади на патиштата кои водат до граничните премини, сè до повлекувањето на косовската полиција од областите населени со српско мнозинство во северно Косово
Министерството за надворешни работи и дијаспора на Косово синоќа ги повика косовските граѓани и припадниците на дијаспората да избегнуваат транзит низ територијата на Србија.
Во соопштението објавено на Фејсбук, косовското МНР повика да се избегнуваат сите влезови и излези на граничните премини меѓу Косово и Србија.
Повикот доаѓа по предупредувањата на таканаречениот „Организациски совет за блокади“ од Србија кој објави дека на 6 септември се планираат блокади на патиштата кои водат до граничните премини, сè до повлекувањето на косовската полиција од областите населени со српско мнозинство во северно Косово.
„Министерството за надворешни работи ги повикува сите граѓани и припадници на дијаспората внимателно да ги следат новите случувања и предупредувања поврзани со ситуацијата и да бидат информирани единствено од официјалните извори на институциите на Република Косово, за да се избегнат дезинформации и лажни вести. Министерството за надворешни работи и дијаспора ќе продолжи да ве информира за сите нови случувања“,
се наведува во соопштението.
Во вторникот, на 3 септември, на протестот на поранешните вработени во српските паралелни институции во општините на северот на Косово, Србите кои протестираа предупредија на радикални акции, до блокирање на границите.
Со образложение дека постои сомневање за издавање фалсификувани документи, минатиот петок косовската полиција презеде акција за затворање на пет паралелни српски институции – општината Округ Косовска Митровица и паралелните општини Северна Митровица, Звечан, Зубин Поток и Лепосавиќ.