Ноќта меѓу 30 и 31 мај на автопатот Гевгелија – Демир Капија, кај клучка Миравци, полициски службеници привеле косовски државјанин откако во неговото товарно возило „сканија“ со скопски регистарски таблички откриле 113 мигранти.
Според билтенот на МВР, триесетгодишниот И.П. од Косово мигрантите ги пренесувал во ладилник.
Се работи за 110 лица од Бангладеш, едно од Индија и двајца од Мјанмар. Полицијата најавува дека по целосно документирање на случајот ќе биде поднесена соодветна пријава против притворениот.
Во билтенот се наведува уште еден случај на откриени мигранти при сообраќајна несреќа на автопатот Демир Капија – Неготино, кај с.Тремник.
Според информацијата од МВР, „ауди“ со скопски регистарски ознаки и „мерцедес“ со струшки регистарски ознаки кои возеле во спротивен правец се судриле со „опел корса“ со неготински регистарски ознаки, при што тешко е повредена В.Н.(53) од Неготино, сопатничка во возилото „корса“, која била пренесена во болницата во Неготино за укажување на лекарска помош.
Возачите на „ауди“ и „мерцедес“ побегнале од местото и засега и се непознати на полицијата, но во непосредна близина на местото на судирот биле пронајдени 19 мигранти кои потврдиле дека се возеле со двете возила.