Во светот досега се регистрирани 230 047 луѓе заразени со коронавирусот, покажуваат последните статистики. Од нив починати се 9 386, а оздравеле 86 256 лица.
Од вестите од светот во врска со новиот вирус, советникот за здравство во британската влада изјави дека Велика Британија не може да ја запре пандемијата на коронавирус, па ќе работи на управување со заразата на тој начин што ќе ги јакне капацитетите во јавното здравство.
Министерката за одбрана на Германија Анегрет Крамп-Каренбауер, пак, изјави дека германските власти ќе ги мобилизираат воените резервисти за борба против ширењето на коронавирусот.
„Околу 2 300 воени резервисти и 900 санитарни резервисти веќе одговориле по првиот повик упатен минатата недела“,
изјави Крамп-Каренбауер.
Германија има околу 75 000 воени резервисти.
Таму бројот на заразени досега изнесува 10 999. Починати се 20 лица.
Канцеларката Ангела Меркел вчера изјави дека пандемијата на овој вирус е најголемиот предизвик за Германија по Втората светска војна.
Француските власти, пак, најавија дека плажите на јужниот медитерански брег на Франција, како и на островот Корзика ќе бидат затворени. Тоа е нова мерка со цел сузбивање на ширењето на епидемијата и е донесена откако било утврдено дека „многу луѓе, многу време“ минуваат на плажите.
Од вестите во регионот, пак, во Босна и Херцеговина потврдени се уште два случаи на Ковид-19. По еден во Зеница и Бихаќ, со што бројката се искачи на 47. Од нив, во Република Српска се 27.
Поранешната претседателка на Хрватска Колинда Грабар-Китаровиќ, пак, соопшти дека следните 14 дена ќе ги мине во самоизолација. Таа на Твитер напиша дека тоа е во согласност со владините мерки, по враќањето од САД, каде ја затекна пандемијата.