Аргентина стана рекордер по освоени трофеи на Копа Америка. Со 16 титули, Аргентинците сега имаат една повеќе од Уругвај, со кој го делеа првото место
Фудбалската репрезентација на Аргентина ја победи репрезентацијата на Колумбија во финалето на 48-то издание на Копа Америка со резултат 1:0. Откако по 90 минути резултатот беше 0:0, напаѓачот од редовите на калчолигашкиот шампион Интер, Лаутаро Мартинез прецизно стрелаше во 112 минута за нов, рекорден трофеј на Лео Меси и неговите соиграчи.
Аргентина стана рекордер по освоени трофеи на Копа Америка. Со 16 титули, Аргентинците сега имаат една повеќе од Уругвај, со кој го делеа првото место, освојувајќи го турнирот 15 пати во историјата.
За Колумбија ова беше трет настап во големото финале, а Копа Америка ја има освоено само еднаш, во 2001 година, кога беа и домаќини на турнирот.
Она што беше забележително за ова финале е што натпреварот доцнеше повеќе од еден час поради нередите кои се случуваа пред стадионот откако фанови се обидуваа на секаков начин без билети да влезат во стадионот.
„Воскресение на Хамес Родригез“
Годинашниот турнир го одбележа и еден од најдобрите фудбалери кои Колумбија некогаш ги имала – Хамес Родригез. Утешна награда за неговата репрезентација е токму тоа што тој беше прогласен за Најдобар играч на турнирот со еден постигнал гол и шест асистенции.
Она што е факт, Хамес Родригез, кој важеше за еден од најголемите фудбалски таленти, сепак не ги исполни очекувањата во својата клупска кариера. На 19 години играше одлични две сезони во дресот на португалскиот гигант Порто, а потоа кариерата ја продолжи во француски Монако. Сепак, најголемиот трансфер во својата кариера го направи во 2014 година по Светското Првенство 2014 кое се одржа во Бразил, во кралскиот клуб Реал Мадрид. Од шест-годишниот договор што го доби во Реал, две години помина на позајмица во германскиот гигант Баерн Минхен.
Освои многубројни титули и со двата тима, но сепак освен неколку големи индивидуални признанија, на Хамес Родригез му се проектираше кариера од многу поголеми размери. Од 2014 до 2020 година одигра околу 130 фудбалски натпревари севкупно.
По неуспешните трансфери во англиски Евертон, катарски Ал-Рајан и грчки Олимпијакос, Родригез во 2023 година премина во бразилски Сао Паоло. По настапите на Копа Америка и признанието Најдобар поединец на турнирот, на 33 години се поврзува со летен трансфер во неколку големи европски клубови, од кој најголемиот веројатно е Атлетико Мадрид.
Лаутаро Мартинез ја понесе наградата „Најдобар стрелец“ со вкупно пет постигнати погодоци, а голманот на Аргентина и прв избор на англиската Астон Вила, Емилијано Мартинез беше прогласен за „Најдобар голман“.
Дарвин Нунез во одбрана на семејството
Уште еден детал од Копа Америка 2024 е тепачката на уругвајскиот напаѓач и фудбалер на англискиот гигант Ливерпул, Дарвин Нуњез со пијани навивачи од Колумбија во рамките на полуфиналните пресметки.
По завршетокот на натпреварот одигран на 11.07.2024, во кој Уругвај беше поразен од Колумбија, Нуњез заедно со Раналд Араухо од шпанскиот фудбалски гигант Барселона излегоа на трибините да се пресметаат со колумбиските навивачи. Во таа прилика Нуњез бил удрен со тупаница во главата. Подоцна беше откриено дека влетале на трибините затоа што полицијата била замината од стадионот, а неколкуте пијани Колумбијци им се нафрлиле на уругвајски навивачи кои всушност биле дел од семејствата на фудбалерите.
Јужноамериканската фудбалска конфедерација (КОНМЕБОЛ) отвори истрага поради големиот скандал, но забележително е и тоа што тренерот на Уругвај, респектираниот Марсело Биелса на прес-конференција јавно ги одбрани своите фудбалери.
Ноќ за паметење за Аргентинските легенди
Можеби најдобриот фудбалер кој некогаш заиграл фудбал, Лео Меси, стана и најтрофеен играч. Аргентинецот вчера го освои 45-от трофеј во кариерата и го помина некогашниот клупски колега од Барселона, Дани Алвеш кој освои 44 титули.
Од друга страна, додека се уште се дискутира како ќе постапи Меси по овој трофеј, титулата од Копа Америка е и послената почест во националниот дрес за Анхел Ди Марија.
Тој заврши со националниот тим и ќе ја продолжи само клупската кариера.
Збогувањето на Ди Марија беше со многу емоции, Скалони го извади во финишот од мечот, а тој излезе плачејќи.
„Сон ми беше на ваков начин да се пензионирам од националниот тим. Аргентина е моја љубов и моја земја. Ви благодарам“,
рече Ди Марија.
Следната Копа Америка e закажана за 2028 година. До тогаш, фудбалските фанови ќе уживаат во уште еден спектакуларен меч помеѓу Шпанија и Аргентина, т.н „Финалисима 2025“.
Натпреварот меѓу победниците на Копа Америка 2024 и Евро 2024 најверојатно ќе се одржи во јуни или јули следната година. Во „Финалисима 2022“, Аргентина ја победи Италија (3:0).