На редовната координација во Собранието денеска ќе се разговара за тоа кога би можела да се одржи пленарната седница за Информацијата за содржината на предлог – преговарачката рамка за пристапните преговори на Северна Македонија со Европска Унија, предложена од француското претседателство.
Претседателот на Собранието Талат Џафери претходно најави дека на координацијата како владин претставник ќе присуствува вицепремиерот за европски прашања Бојан Маричиќ.
„Во понеделник имаме координација на која ќе присуствува и владиниот претставник и ќе разговараме. Ќе се направи проценка. Материјалот е дојден во Собранието, но во понеделник треба да почне седницата за ребалансот на Буџетот“,
изјави Џафери.
Тој вели дека доколку има потреба седницата може да се прекине и да се закаже нова на која на дневен ред би била Информацијата испратена од Владата.
Пратениците од ВМРО-ДПМНЕ побараа Џафери да ги врати материјалите назад во Владата со забелешка дека е испратена само Информација, без ниту еден документ.
Од СДСМ, пак, сметаат дека одговорноста е на законодавниот дом да донесе натамошни заклучоци, согласно собраниските процедури. Џафери е на став дека сите документи се веќе јавно достапни и секој може да ги види.
Во меѓувреме, во земјава продолжуваат протестите против францускиот предлог, кои се поддржани од опозициската ВМРО-ДПМНЕ и од Левица. Протестен марш се одржа вчера од Владата преку Министерството за правда до Собранието, а протест е најавен и за денес.