Шефот на дипломатијата Бујар Османи истакна дека Франција е првата земја која во редовен работен однос има амбасадор за спортска дипломатија и една од земјите која има развиено стратегија за спортска дипломатија, што кај нас, како што рече тој, мора да признаеме е прилично нова терминологија
Спортот е навистина универзален јазик, поврзан со вредности, но постои и тесна и дамнешна поврзаност помеѓу спортот, политиката, дипломатијата. Спортот е дел и од специфична соработка во рамките на новиот пристап меѓу Северна Македонија и Република Бугарија, нов пристап за којшто се надеваме дека набрзо ќе ги даде европските резултати.
Ова го истакна францускиот амбасадор Сирил Бомгартнер на денешната конференција организирана од Министерството за надворешни работи во соработка со Владата и Амбасадата на Француската Република во Скопје, на тема „Спортска дипломатија: Спортот како алатка за унапредување на национални интереси и надворешно-политички приоритети“.
„Постои тесна и дамнешна поврзаност помеѓу спортот, политиката, дипломатијата. Затоа што Олимписките игри откако повторно беа воспоставени од Пјер де Кубертен во 1894 година, најавувале епизоди со вистински политички интензитет. Олимписките игри во Берлин во 1934 година беа навистина вистинска пропаганда, како и политичките игри сега во Пекинг, односно пинг-понг дипломатијата стана воспоставена практика откако американските и кинеските играчи на пинг-понг помогнаа за затоплување на односите помеѓу Кина и САД. Би можеле да ги зголемиме примерите и да стигнеме наназад до антиката. Но, ќе кажам дека спортот е дел од специфична соработка во рамките на новиот пристап меѓу Северна Македонија и Република Бугарија, нов пристап за којшто се надеваме дека набрзо ќе ги даде европските резултати“,
Бомгартнер.
Во однос на предизвиците поврзани со спортската дипломатија кои може да бидат од економска природа, нагласи тој, постои вистинска спортска индустрија и една активна дипломатија може да помогне во тоа промовирање.
„Спортот може да помогне во туристичката атракција како што е и гастрономијата и културното наследство или архитектурата. Организирањето на големи спортски шампионати дава навистина различна понуда во спортска област со која што се повеќе се привлекува поголема публика, но и му помага на еден патник да ја избере својата дестинација. Знаеме исто така дека спортски натпревар во светски рамки е исто така важна алатка за развој на инфраструктура во една земја, тука пред се мислам на моментот кога се организираат Олимписки игри“,
рече Бомгартнер.
Пет од целите на трајниот развој на ОН се поврзани со спортот како што се родова еднаквост, социјална инклузија и заштита на нашата Планета, и затоа, нагласува тој, спортската дипломатија значи постојана борба за нашиот свет да биде подобар.
Франција развива спортска дипломатија која е своевидна авангарда во светските рамки, и од јануари 2014 година именува и амбасадор за спорт. Бомгартнер нагласи дека постои и спортска соработка помеѓу Франција и Северна Македонија. Амбасадата постојано го поддржува планинскиот туризам и спортот, особено на француски алпинисти, но исто така земјата ја посетиле и голем број на спортски новинари. Оваа соработка околу природата има и еколошка димензија и истовремено врши унапредување на природното културно богатство кое што го поседува оваа земја.
Во перспектива на Олимписките и Параолимписките игри во Париз 2024 година, амбасадорот Бомгартнер нагласи дека спортот зазема значајно место и во рамките на француското претседавање и најави организирање две тематски конференции за спортот и целите за траен развој во партнерство со УНЕСКО и во Стразбур во Европскиот парламент.
Шефот на дипломатијата Бујар Османи истакна дека Франција е првата земја која во редовен работен однос има амбасадор за спортска дипломатија и една од земјите која има развиено стратегија за спортска дипломатија, што кај нас, како што рече тој, мора да признаеме е прилично нова терминологија.
„Спортот може да прави промоција на сите наши вредности, но и да служи како мост меѓу народите во регионот, во Европа и пошироко. Неопходна е и стратегија и дополнителен напор за да се ориентира спортскиот потенцијал кон националните приоритети и интереси, имајќи на ум дека навистина тоа е благородна работа“,
истакна Османи.
Поради тие причини, додаде министерот, Северна Македонија ги користи и ги знае предностите за развој на меѓународните односи преку спортската дипломатија, но и ќе се обиде да даде поголем придонес и да воспостави заеднички пријателства со повеќе земји во светот, како што го правиме со Франција.
Тој, во контекст на актуелното претседавање на Франција со ЕУ, додаде дека за нас е многу важно што Франција го поддржува процесот на интеграција со земјите од Западен Балкан со јасно поставени стандарди.
„Сите очекуваме дека оваа нова динамика ќе резултира за нас со за нас позитивно решение, а тоа е старт на преговорите што ќе биде поддржано од сите членки на ЕУ. Но како што напоменав погоре, да не се оптоваруваме со политички теми на овој настан, туку да се задржиме на спортската дипломатија како тема што не обединува денеска,“
додаде Османи.
На конференцијата ќе има три панел дискусии на теми како „Спортот како алатка за дипломатски цели и постигнување на надворешно-политички приоритети“, „Спортот како алатка за економски развој и привлекување на инвестиции“ и „Спортот како платформа за афирмација на вредности и креирање на одржливи партнерства“. На дебатата ќе учествува и амбасадорката за спортска дипломатија во Франција, Лоренс Фишер.