На социјалните мрежи се споделуваат различни искуства од граничните премини кон Грција – од брзо поминување на границата до чекање од околу еден час, при што најголеми задржувања има кај автобусите
Повеќе од три илјади македонски државјани утринава ја поминале македонско-грчката граница на преминот „Богородица“, информираат од Министерството за внатрешни работи (МВР).
Од МВР велат дека на истиот граничен премин, до 10 часот, поминале над 11 илјади државјани на други земји.
Од македонска страна, додаваат од МВР, не е забележан застој на граничните премини на југоисточниот дел од земјата и додаваат дека се преземни мерки со ставање на функција на сите човечки и технички капацитети за да се забрза протокот на патници, со спроведување на задолжителните гранични проверки.
На социјалните мрежи се споделуваат различни искуства од граничните премини кон Грција – од брзо поминување на границата до чекање од околу еден час, при што најголеми задржувања има кај автобусите.
Ако се погледнат, пак, камерите на веб-страната на Јавното претпријатие за државни патишта може да се види каква е состојбата на граничните премини за излез од земјата. Според видеата од таму, од македонска страна воопшто нема застој и на „Богородица“ и на „Меџитлија“.
Зголемениот сообраќај за излез од земјава низ граничните премини кон Грција е очекуван поради празничниот продолжен викенд. Подолг застој на границите се забележува и во останатите викенди, поради примената на ЕЕС регулативата која стартуваше на 10 април.
Портпаролот на грчката Влада на вчерашниот брифинг, на новинарско прашање од МИА, дали ќе се одложи имплементацијата на системот и кај балканските туристи, соопшти дека регулативата ЕЕС им дава различни алатки и можности на земјите-членки за справување со евентуални притисоци на граничните премини, а Грција ќе ја оценува состојбата и ќе ги презема соодветните мерки за да го опслужува зголемениот број патници и да е во согласност со законските правила.