Композиторот Константинов на доделувањето на наградата истакна дека патот кој го минал до оваа свечена пригода бил долг и трнлив, со стотици табаци испишана нотна хартија и илјадници часови поминати во музичките студија на создавање музика за програмските потреби на радиото и музика наменета за театарската сцена, филмската уметност и телевизијата, што е, рече, негова главна животна преокупација
Секое дрво има корен и секој народ има корен, а денешната награда е симбол на нашата слобода за која треба секојдневно да се бориме, но и симбол на нашиот корен. Вака претседателката на Одборот за доделување на државната награда „11 Октомври“ за 2023, Синоличка Трпкова, го најави годинашниот добитник, истакнатиот композитор Љупчо Константинов.
„Но, слободата подразбира и лична и колективна одговорност за нашето денес и за нашето утре. Чувањето на слободата е наша обврска и одговорност, зашто таа слобода и денес е загрозена од непризнавањето и отсуството на почит, негирањето на нашата самобитност, јазик и историја. Во ова време на цивилизациски, технолошки и културни достигнувања кога светот е оддалечен само еден клик од нас, зар има место за непријателство, нетрпение, условување, закани, особено од оние што ни се најблиски? Јас сепак верувам во добрината и разумот на обичниот човек да се справи со сето она што влече длабоко назад. Јас верувам во солидарност, подавање рака за да се отворат хоризонтите за надеж, пријателство, соработка и заедништво“,
рече Трпкова.
Трпкова рече дека од срце сака оваа награда да продолжи да ги вреднува постигнувањата на заслужни и истакнати поединци, граѓани на Македонија, достигања што, како што рече, се доказ дека ние сме слободни луѓе во наша слободна држава која ни овозможува да твориме во сите области на нашето заедничко живеење, во културата, уметноста и образованието.
Таа подвлече дека Одборот за доделување на оваа награда во посочените области, годинава одбра само еден, но, како што рече, вреден добитник.
Композиторот Константинов истакна дека патот кој го минал до оваа свечена пригода бил долг и трнлив, со стотици табаци испишана нотна хартија и илјадници часови поминати во музичките студија на создавање музика за програмските потреби на радиото и музика наменета за театарската сцена, филмската уметност и телевизијата, што е, рече, негова главна животна преокупација.
Јазикот на музиката, според Константинов, не познава граници, таа ја поседува неверојатната моќ да допре длабоко во нашите чувства без разлика на припадноста, потеклото и верата.
„Во изминативе 50 години имав можност да работам на голем број значајни проекти како во бившите републики од некогашната заедничка држава, така и надвор од неа, соработувајќи со бројни уметници во различни културни средини, со некои од кои денес одржува пријателски врски, што ме прави особено богат. Наградата ‘11 Октомври’ ја доживувам како одраз на почит и благодатен дар од страна на државата на која ѝ припаѓам и одѕив на нејзината моќ и мудрост. Таа на најубав можен начин ја заокружува мојата досегашна кариера и ме обврзува понатаму да бидам уште подобар“,
рече Константинов.
Љупчо Константинов е роден на 11 декември 1946 година во Охрид. Средно музичко училиште завршил во Битола, а музичка академија во Белград. Најголемиот дел од својот работен век го поминал во МРТ како музички новинар, продуцент, уредник на забавната програма на МРТ, а својот работен век го завршува како композитор за програмските потреби на МРТ.
Во својот опус вбројува повеќе забавни композиции, над 200 аранжмани. Како автор на музика се јавува во играни документарни и анимирани филмови, во ТВ-филмови, серии и драми. Во текот на повеќе од 40 години соработувал со голем број познати имиња од театарската, филмската и телевизиската уметност во земјава и надвор од неа. За своето богато творештво носител е на голем број домашни и меѓународни награди и признанија, како и на Наградата за животно дело на Сојузот на композиторите од Македонија.
Константинов остави траен белег во македонското музичко творештво со својот раскошен талент. Ќе остане запаметен почнувајќи од неговата авторска песна „Еј ти младо момче“, што култната екс-ју група „Индекси“ ја изведе на Скопскиот фестивал во 1971, преку бројните претстави, во најголем дел носители на видни награди, сѐ до неговата непроценлива музика во долгометражните филмови „Среќна нова 49“, „Македонската сага“, „Црвениот коњ“, „Тетовирани“ и многу други.
Со државната награда „11 Октомври“ се оддава највисоко признание за животно дело во областа на науката, уметноста, стопанството и во другите дејности од јавен интерес.