Експратеникот од ВМРО-ДПМНЕ, Илија Димовски, во фејсбук обраќање до министерот Бујар Османи вели дека Албанците во Македонија мора да останат рамо до рамо со Македонците. Тој смета дека прифаќањето на францускиот предлог е навреда за Македонците, но и дека ќе го одложи, а никако нема да го забрза евроинтегративниот процес. Османи, исто така, на фејсбук му реплицира на Димовски и вели дека прашањата не може да се делат на „албански“ и „македонски“ оти се заеднички предизвик и му одговори по сите наведени точки
Експратеникот на ВМРО-ДПМНЕ Илија Димовски преку фејсбук-статус повика да се отфрли предлогот на француското претседателство и му се обрати лично на министерот за надворешни работи, Бујар Османи. Вели дека како „Илија на Бујар“ му дава примери со Албанците за да долови што Османи и колегите се обидуваат да направат.
„Замисли Бујар, некој да ти предложи и да те пристиска, а ти, уште повеќе, да потпишеш и прифатиш дека: прво, Албанците во Македонија не се ист народ со Албанците во Албанија, исто како што во ‘Преспа’ пишува дека Македонците од Македонија и Македонците од Грција немаат ништо заедничко и не се исти.
Второ, замисли да мора да прифатиш и потпишеш дека Енвер Хоџа ја создал албанската нација на вештачки начин, онака како што бугарското собрание со својата Декларација од 2019 година тврди за Тито и Македонците.
Трето, еве помисли Бујар, како би ти било да треба да потпишеш и прифатиш дека Албанците во Македонија не смеат да го користат албанското знаме исто онака како што со Времената спогодба, а потоа и со ‘Преспа’ забранувате и брусите онаму каде што има македонско шеснаесеткрако сонце“,
пишува Димовски.
Понатаму, Димовски му вели на Османи да замисли како би било кога ДУИ би морала да прифати и потпише дека Ѓерг Кастриот е Србин, а Хасан Приштина е Турчин, како што, според Димовски, нас ни се случува со Гоце Делчев и други борци за слобода на Македонија.
„Би се согласил ли Бујар да ставиш во меѓународен правен договор дека Албанците немаат никакво илирско потекло ниту културолошко наследство од Илирите и дека на пример Илирите се Словени, а не Албанци, исто онака како што со Преспа прифативте дека ние Македонците немаме никакво македонско потекло и дека Македонците биле Грци (види ‘Преспа’, член 7). Шесто, како би ти било да правиш ‘мали’ компромиси за албанската нација и историја со оние што секојдневно и со години наназад тврдат дека албанската нација е вештачка и создадена со албанизирање на Турци, Словени, Власи и Роми исто онака како што секојдневно преговарате ‘мали’ компромиси за историјата со оние кои имаат ваков однос и тврдење кон нас Македонците. Еве вака изгледаат работите низ призмата на Македонците, доколку сакаш да погледнеш и знаеш. Ова што го напишав не го посакувам на никому,ама не сакам ниту да дозволам некој да ме убедува дека ова што им се случува на Македонците е базирано на нормални европски вредности, затоа што не е“,
пишува Димовски.
Тој во директното обраќање до Османи вели дека Албанците во Македонија во овој случај мора да останат рамо до рамо со Македонците. Тој смета дека прифаќањето на францускиот предлог е навреда за Македонците, но и дека ќе го одложи, а никако нема да го забрза евроинтегративниот процес.
Министерот за надворешни работи, Бујар Османи, исто така на фејсбук му реплицира на Димовски и вели дека прашањата не може да се делат на „албански“ и „македонски“, оти се заеднички предизвик.
„Фактот што сме прифатиле во името на добрососедските односи, да не се мешаме во уредувањето на колективните права кај нашите соседи, не го менува фактот за тоа како се чувствува или како се изјаснува било кој Македонец на планетата земја. Напротив, еднаш засекогаш ја затворивме дилемата што значи зборот Македонец, и тоа веќе никој никогаш не може да го смени. Неправедно е да ја вмешуваме историјата како да е дел од современите политички текови, наместо да им ја оставиме на историчарите да нѐ ослободат од историските митови кои ни ја заматуваат иднината. Тоа е добар начин да се ослободиме од овие стеги, за да ја затвориме расправата кој и што е Илија, кој и што е Бујар и каков јазик зборуваат“,
напиша на фејсбук МНР Османи.
Тој вели дека сега е моментот да се затвори прашањето за јазикот во ЕУ, еднаш засекогаш, за да не се остави на менито на бугарските партии кои после следните избори ќе ни ги дефинираат правилата за влез во ЕУ.
„Се тврди дека со предложената рамка, заклучоци итн…, македонскиот јазик на различни начини ќе биде загрозен. А фактите се токму спротивното: И во рамката, и во предлог заклучоците и во сите документи, во моментот на старт на преговорите – македонскиот јазик станува официјален јазик на кој Европската Унија ќе комуницира, и тоа без никакви фусноти, ѕвездички, дообјаснувања, астерикси, без било што. Овој официјален јазик подоцна, со нашето членство во Унијата, станува чист службен јазик на Унијата, на ист начин како што се и Германскиот, Францускиот, па и Бугарскиот и сите други јазици. Значи Унијата ја усвојува рамката каде стои дека европското Аки (Acquis), европското законодавство, ќе се преведе на Македонски јазик без никаква додавка – и тоа станува затворено прашање за Унијата“,
пишува Османи.
Понатаму, шефот на дипломатијата посочува дека Договорот за добрососедство, исто како и Договорот од Преспа, во секоја предлог рамка која било кога сме ја добиле како драфт, биле како репери по кои ќе се следи дали земјата остварува опипливи резултати. Тој порачува дека е лага оти сѐ се одложува за кога ќе се извршат промените во Уставот.
„А фактичката состојба е следна: Со усвојување на заклучоците, се усвојува и содржината на рамката, пред почетокот на преговорите и одржување на Првата меѓувладина седница – и тоа се случува сега и веднаш! Преговарачката рамка се дефинира сега, се усвојува сега – и тоа е завршен процес! По одржувањето на Првата меѓувладина седница, во полн капацитет го почнуваме процесот на скрининг, задолжителен процес кој го минуваат сите земји, и кој во просек трае една година. Нема одложување, нема застој, нема поместување, нема ништо – ги почнуваме преговорите онака како што сите претходно тоа го правеле, исто како што тоа ќе го направи и Албанија. Тоа е сосема доволен период ние да ги завршиме и нашите уставни промени, обврски кои секако ги преземаме. Ако сме искрени дека немаме проблем да ги внесеме Хрватите, Бугарите и Црногорците како прифатени етнички заедници во земјава, тогаш не треба тоа да го одложуваме до бескрај. Имаме доволно време во овој период да си ги завршиме обврските и потоа, онака како што е предвидено за секоја земја, по завршувањето на скринигот да почнеме со отворање на кластерите и поглавјата“,
заклучува Османи.