Потпретседателот на Либералната интернационала и поранешен државен секретар во македонското Министерство за надворешни работи, Емил Кирјас, во вечерашната дебата во емисијата „360 степени“ вели дека Европската унија мора да има кризен механизам за брзо справување со кризи како оваа предизвикана од ковид-19.
Кирјас, пред неколку дена на Фејсбук со цинизам напиша дека ЕУ треба да организира Самит и во следните шест месеци да усвои нова методологија за тоа како да се справи со прашањето.
„Ако некоја членка бесмислено го блокира финалниот предлог, Советот може да му се наврати на прашањето следната година. Без брзање искористете истиот пристап како и за проширувањето … за кохерентност, се разбира. Цинизам настрана, не можам да сфатам дека нема активен механизам на ЕУ за реагирање на брзи кризи по сè што се случи во последната деценија“,
напиша Кирјас.
Во вечерашната емисијата „360 степени“, Кирјас појаснува дека доколку ЕУ не најде кризен механизам за да реагира брзо, ќе се соочи со губење на кредибилитетот и пред своите граѓани, но и пред граѓаните на Западен Балкан.
„Како се справува Европската унија со ковид-кризата, но и целата претходна декада, како се справуваше со финансиската криза, со бегалската криза, не ни дава за можност да констатираме дека ЕУ се снаоѓа на добар начин. Треба да наоѓаме начин како ќе се решаваат работите. Мора да има кризен механизам каде Европската унија ќе може веднаш да се соочува со проблемите. Начинот на кој се поставува во моментот или начинот на кој ја третира Македонија, па и Косово во изминативе години е индикатор дека работите мора да менуваат. Ако продолжат вака, ЕУ самата пред своите граѓани, но и граѓаните на Западен Балкан ќе го изгуби целосно својот кредибилитет“,
вели Кирјас.